Майа сэлиэнньэтигэр Дьокуускайдааҕы медицинскэй колледж салаатын үөрүүлээхтик аһыы буолла. Үөрэх тэрилтэтэ В.П. Ларионов аатынан Майа 1 № — дээх орто оскуола уонна оройуон киин балыыһатын баазаларыгар «Эмтиир дьыала» уонна «Сестринскай дьыала» хайысхаларынан исписэлиистэри бэлэмниэҕэ. Үөрэҕи 54 устудьуон ааһыаҕа, диэн өрөспүүбүлүкэ үөрэҕин уонна наукатын министиэристибэтэ иһитиннэрэр.
Тэрээһин кэмигэр улуус баһылыга Дмитрий Тихонов устудьуоннары практическай бэлэмнээһиҥҥэ 1 мөлүйүөнтэн тахса суумалаах манекеннары уонна оборудованиены туттарда.
Дьокуускайдааҕы медицинскэй колледж дириэктэрэ Дмитрий Алексеев этэринэн, отделениеҕа киирии куонкуруһугар биир миэстэҕэ икки киһи буолбут. 54 үөрэххэ киирбит устудьуон ортотугар 28 — сыаллаах үөрэнээччилэр бааллар. Ону сэргэ отделениеҕа Горнай, Чурапчы уонна Орто Халыма оройуоннарыттан устудьуоннар үөрэниэхтэрэ. Устудьуоҥкалартан биирдэстэринэн 11 оҕону иитэр герой ийэ Акулина Афонская буолар.
Улууска орто медицинскэй персонал кадрдарыгар наадыйыы Аллараа Бэстээх бөһүөлэгэр учаастактааҕы балыыһа саҥа медицинскэй корпуһун, кырдьаҕас дьоҥҥо уонна инбэлииттэргэ аналлаах интернат-дьиэ саҥа дьиэтин тутуутунан, ону тэҥэ оройуон фельдшерскэй-акушерскай пууннарын хааччыйыы наадатынан сибээстээҕэ бэлиэтэнэр.
This post was published on 08.09.2025 15:06 15:06