Мэҥэ-Хаҥалас улууһун I Наахара нэһилиэгэр бастакы өрөспүүбүлүкэтээҕи «Аҕа күрэҕэ» ыытыллар. 18 улуустан 22 аҕалар уонна уолаттар хамаандалара бастыыр иһин киирсэллэр.
Күрэхтэһии нэһилиэк биир кэрэ көстүүлээх сиригэр — Дьигдьи күөлүгэр ыытыллар. Үлэ уонна социальнай сайдыы миниистирин солбуйааччы Афанасий Постников эҕэрдэ тылын кэмигэр 2019 сыллааҕы «Аҕа күрэҕэ» кыайыылааҕар Вячеслав Соколовка махтал суругун туттарда.
Бастакы күн кыттааччылар үс түһүмэҕинэн күрэхтэстилэр: «Булт биатлонугар», «Остуолбаҕа ыттыыга» уонна «Ойбон алларыытыгар». Видеонан «Визитка» түмүгэ биллибит. Манна хамаандалар дьиэ кэргэннэрин туһунан, тугунан үлүһүйэллэрин, аҕа – уол сыһыаннара хайдах сайдалларын, дьиэ кэргэн үгэһин туһунан кэпсээбиттэр.
Хамаандалар сахалыы таҥастаах улуустарын былааҕын тутан парадтаабыттара көрөөччүлэр сэҥээриилэрин ылбыт. Итини таһынан тиэхиньикэ (тыраахтырдар) парадтара ыытыллыбыт. Күрэхтэһии аһыллыытын «Кыталык» үҥкүү ансаамбыла, Төхтүр «Манчаары» барабаанньыттарын бөлөҕө киэргэппит.
Күрэхтэһии коронавирус ыарыытыттан харыстанар бары миэрэлэри тутуһан ыытыллар. Күрэхтэһээччилэр ыспыраапкалаахтар, күҥҥэ иккитэ термометрияны ааһаллар, мааска кэтэн, антисептигынан сотто сылдьаллар.
