Мэҥэ Хаҥалас улууһун Нөөрүктээйи нэһилиэгин олохтоохторо «Экология» национальнай бырайыак чэрчитинэн «Арассыыйа уута» бүтүн Дойду үрдүнэн ыытыллар улахан волонтерскай хамсааһыҥҥа кыттыһаннар күргүөм субуотунньукка таҕыстылар.
Нэһилиэк дьоно-сэргэтэ иһэн-аһаан, күннээҕи олоххо туттан олорор ууларын харыстыыр сыаллаах тоҕус түөлбэнэн мустан нэһилиэк күөллэрин ыраастаатылар. Көҕүлээччилэринэн СӨ Экология министиэристибэтин бэтэрээнэ, Айылҕа харыстабылын туйгуна, судаарыстыбаннай инспектор Августа Архипова салайыылаах Павловскай орто оскуолатын 1972 сыллааҕы выпускниктара, түөлбэлэр салайааччылара буоллулар.
Павловскайдар ууларыгар харыстабыллаахтык сыһыаннаһыылара, ыраастааһынынан эрэ муҥурдаммакка, чинчийэр үлэни ыыталларыттан эмиэ көстөр. Ол курдук, тулалыыр эйгэ учуутала Тамара Нестерева оҕолору кытта чинчийэр үлэни ыытан, ааҕыларга кыттан өрөспүүбүлүкэ чөмпүйүөннэринэн, Арассыыйа дипломаннарынан ааттаммыттара.
Бу күн нэһилиэк олохтоохторо кыратыттан эмэнигэр тиийэ күргүөм, өрөбүл күнү аахсыбакка, туруорсууну өйөөн
«Ыраас уу — олох төрдө» диэн девизтээх айылҕаҕа, тулалыыр эйгэҕэ харыстабыллаахтык сыһыаннаһыыны көрдөрөр аахсыйаҕа көхтөөхтүк кыттыыны ыллылар.
Мэҥэ Хаҥалас улууһун дьаһалтатын пресс-сулууспата
This post was published on 24.09.2024 13:23 13:23