Хорообут нэһилиэгэр сытан эмтэнэр балыыһа дьиэтэ сабыллан хаалан, врачебнай амбулатория буолбута ыраатта.
АТС, почта дьиэтигэр ананан тутуллубут дьиэни ОПХ дириэктэрэ Иван Тимофеев балыыһа тиэргэнигэр көһөртөрбүтэ.Нэһилиэк баһылыга Прокопий Плотников туруорсуутунан Хорообукка “Доруобуйа” национальнай бырайыагынан саҥа пуун дьиэтэ тутуллуута былааннаммыта. Билиҥҥи баһылык Гаврил Бродников тиһэҕэн тиэрдэн олоххо киллэрдэ.
Аныгылыы матырыйаалынан былааннаммыт тутууну Ион Цыпандин салайааччылаах Родион Стручков, Николай Цыпандин, Николай Петров, Иван Цыпандин биригээдэнэн бэрт кылгас кэмҥэ таҥан бүтэрдилэр.
Күрүөтүн-хаһаатын балыыһа суоппара Михаил Григорьев уоппускатын кэмигэр оҥордо. Маһа субуотунньук бэрээдэгинэн бэлэмнэннэ. Ититии ситимин турбаларын Хорообут нэһилиэгин дьаһалтата булан биэрдэ.
Павел Скрябин, Эркээйи
