Мэҥэ Хаҥалас улууһун Бөкө нэһилиэгэр саха балаҕаныгар Аҕам саастаахтар дэкээдэлэригэр анаммыт «Ретро-биэчэр» тэрээһин ыытылынна.
Тэрээһини култуура киинин үлэһиттэрэ Николай Новгородов, Валентина Иванова иилээн-саҕалаан ыыттылар. Нэһилиэк баһылыга Петр Сивцев мустубут дьону Аҕам саастаахтар дэкээдэлэринэн эҕэрдэлээтэ уонна нэһилиэккэ күн бүгүн ыытылла турар үлэ-хамнас туһунан билиһиннэрдэ. Улуустан Ытык Сүбэ бэрэссэдээтэлэ Зиновий Игнатьев, нэһилиэк Ытык Сүбэтин бэрэссэдээтэлэ Гаврил Стручков, култуура киинин дириэктэрэ Айталина Иванова эҕэрдэ тылларын эттилэр. Ылбаҕай ырыаларынан култуура үлэһиттэрэ Николай Новгородов, Валентина Иванова, Анатолий Иванов тэрээһини киэргэттилэр.
Ретро-быыстапканан фотозона оҥоруутугар түөлбэлэринэн күрэххэ «Алгыс» (сал.Г.И. Черемхина), «Дьулуур» (сал.О.Н.Скрыбыкина) түөлбэлэр олус үчүгэйдик кыһаллан оҥостубуттара бэлиэтэннэ. Дьүүллүүр сүбэ быһаарыытынан бу икки түөлбэ бастааннар, иккилии тыһыынча солкуобай суумалаах сэртипикээттэри туттулар.
Ретро-муоданы көрүүгэ олохтоохтор түөлбэнэн 70-80-с сыллардааҕы таҥас кэппиттэрэ биһирэннэ. Тутатына хоһоон айыллан, тустаах дьону таайтарыыга «Догдоҥо дорҕоонноро» түмсүү чилиэнэ Г.С.Стручков оонньуу оонньотто.
Урукку кэмнээҕи ырыа-тойук, үҥкүү-битии баар буолла, кэлбит дьон ааспыт кэми санатар фотослайда көрөн, уруккуну санаһан, астаах остуол тула ирэ-хоро сэһэргэһэн тарҕастылар.
Эркээйи хаһыат
