Дойду үрдүнэн ыытылла турар быстах хомуурга Мэҥэ Хаҥалас улууһун Догдоҥо нэһилиэгиттэн биир эдэр киһи хабыллан барбыт.
Бу иннинэ хантарааҕынан биир уол баҕа өртүнэн сулууспалаабыт. Хантарааҕынан барбыт уол билигин уоппускаҕа сылдьар. Бу туһунан мин Догдоҥо нэһилиэгин баһылыгынан талыллан үлэтин саҕалаабыт баһылык Петр Сивцевтэн интервью биэрэригэр көрдөстүм.
Петр Дмитриевич маннык иһитиннэрдэ: «Быстах хомуурга итиэннэ хантарааҕынан барбыт уолаттарбытыгар нэһилиэкпит дьоно-сэргэтэ өйөөн харчынан көмө оҥордулар. Кэлэр нэдиэлэҕэ нэһилиэкпит дьокутааттарын сессиятыгар хас биирдиилэригэр 20-лии тыһыынча солкуобай харчыны көрүөхпүт диэн олоробут. Улууспут дьаһалтата 30-туу тыһыынчаны көмө биэрэр. Онон бу күннэргэ байыастарга 50-нуу тыһыынча солкуобай харчыны тиксэриэхпит. Нэһилиэк олохтоохторо оҕотуттан кырдьаҕаһыгар тиийэ бэйэлэрин күүстэринэн араас хабааннаах көмөнү дойдуларын көмүскэлигэр сылдьар уолаттарбыт чугас дьонугар оҥоро сылдьаллар».
Марелла Баишева, Эркээйи
This post was published on 20.10.2022 12:05 12:05