1 Алтынньы 01.10
  • -1°
  • $ 55,3
  • 52,74

Мэҥэ Хаҥалас Бэдьимэтигэр эһэ сүөһүлэргэ саба түспүт

Ааспыт түүн тыатааҕы Бэдьимэ бөһүөлэктэн 1 километр тэйиччи турар Былаҕанчыга Александр Алексеев хаһаайыстыбатыгар сылдьан ааста, бу туһунан Эркээйи суруйар.

Мэҥэ- Хаҥалас улууһун 1- кы Баатара нэһилиэгэр ийэ эһэ оҕотунаан уонна биир атыыр улахан эһэни бэлиэтии көрбүттэр.

Тыа хаһаайыстыбатын исписэлииһэ Саргылана Атласова кэпсииринэн, Александр Георгиевич хаһаайыстыбатыгар сааһын 12 ынах сүөһү баар эбит. Эһэ түүнүн кэлиэн иннинэ, 19 төбө сүөһүлээх, ол иһиттэн 7 ыанар ынахтаах эбит.

Александр сүөһүлэрэ сайынын аһаҕас халлаан анныгар хоно сылдьыбыттар. Ынахтарын эмиэ хотон таһыгар ыыр эбит. Быһылаан түүн 1 чаас саҕана буолбут. Ынах, ньирэй аймалҕанын истэн хаһаайын дьиэттэн тахсан хотоҥҥо барбыт. Түүҥҥү ыалдьыты көрөн, Александр дьиэтигэр төттөрү сүүрэн, дьону көмөҕө ыҥырбыт. Улахан адьырҕа кыылы өлөрөр саа суох буолан биэрбит. Эһэ дьон саҥатыттан куоппут. Биир улааппыт ньирэй төрүөҕүн тырыта тыыппыт. Быһыыта, улаханнык аччыктаабыт быһыылаах. Оттон биир ньирэйи уонна биир ынаҕы, норуокка этэллэрин курдук, «бэлиэтээбит».

Тыа дьоно кэлбиттэригэр ынахтары барыларын хотоҥҥо киллэрэн баайталаабыттар. Саргылана Васильевна этэринэн, эһэ сүөһүгэ саба түһүүтүн туһунан акт оҥоһуллубут. Суукканы быһа дьуһуурустубаны олохтообуттар. Экология сулууспатыттан адьырҕа кыылы суох оҥорорго көҥүл ылылыннаҕына, кыылы бултаһан саҕалыахтара. Арааһа бу ол дьон көрбүт улахан эһэ буолуо диэн сабаҕалыыллар.

Следите за самым важным и интересным в Telegram-канале и WhatsApp-группе ЯСИА
1
0