Мас-рестлинг федерациятын үгэс буолбут кубога быйыл Дьокуускай куоракка ыытыллыаҕа. Күрэхтэһиигэ өрөспүүбүлүкэ бастыҥ хамаандатын аатын сүгэр туһугар аҕыс муниципальнай хамаанда киирсиэҕэ диэн, СИА иһитиннэрэр.
«Саха сирин мас-рестлиҥҥэ федерациятын кубога быйыл өрөспүүбүлүкэ киин куоратыгар буолуоҕа. Күрэхтэһии ахсынньы 15-16 күннэригэр ыытыллара былааннанар. Үгэс быһыытынан кубок иһин өрөспүүбүлүкэ чемпионаттарын уонна күрэхтэһиилэрин кыайыылаахтара киирсиэхтэрэ», — диэн Саха сиринээҕи мас-рестлинг федерациятын толорооччу дириэктэрэ Андрей Сидоров иһитиннэрдэ.
Федерация кубогар эр дьон, дьахталлар, ыччат уонна бэтэрээн саастаах спортсменнар кыттыахтара. Күрэхтэһии «стенка на стенку» быһыылаах ыытыллыаҕа. Маҥнай бөлөҕүнэн киирсэн полуфиналга уонна финалга кыттааччылары быһаарыахтара.
