«Модун» спорткомплекска сэтинньи 24 күнүгэр мас тардыһыыга абсолютнай ыйааһыҥҥа Саха сирин чемпионата ыытыллыаҕа. Көрөөччүлэр өрөспүүбүлүкэ күүстээх спортсменнарын барыларын көрүөхтэрин сөп. Күрэхтэһии Арассыыйа абсолютнай чемпионатыгар сүүмэрдиир түһүмэх быһыытынан ыытыллыаҕа, диэн СИА иһитиннэрэр.
Федор Дегтярев 60 сааһыгар аналлаах Чемпионат эр дьоҥҥо 75 киилэҕэ диэри, уонна 75-тэ үрдүк ыйааһыннаахтарга буолуоҕа. Оттон дьахталлар ортолоругар абсолютнай ыйааһыҥҥа бастыҥ көрдөрүүлэри быһаараллара былааннанар.
Үрдүк ыйааһыҥҥа икки фаворит баар: Томпо улууһуттан Сергей Фролкин уонна Өлүөхүмэ оройуонуттан аан дойду абсолютнай чемпионатын үрүҥ көмүс призера Евгений Попов. Маны таһынан, эмиэ Эрчим Баппаҕай, Валентин Горохов, Вениамин Попов, Денис Максимов киирсиэхтэрэ.
75 кг диэри ыйааһыҥҥа сүүрбэттэн тахса кыттааччы сайаапка биэрдэ. Манна конкуренция күүстээх буолан, ким кыайарын киһи билбэт.
Дьахталларга аан дойду абсолютнай чемпиона Татьяна Баишева, Саха сирин чемпиона Лия Плотникова кыайыы иһин киирсиэхтэрэ диэн сабаҕалыыллар.
This post was published on 22.11.2022 16:03 16:03