Саха сирэ аан бастаан мас-рестлиҥҥэ Арассыыйа чөмпүйэнээтин ылыаҕа. Эр дьон уонна дьахталлар ортолоругар сүрүн старт кулун тутар 21-22 күннэригэр буолуоҕа. Өрөспүүбүлүкэ сүүмэрдэммит хамаандата күүстээх састаабы туруорарга бэлэм, диэн ЯСИА иһитиннэрэр.
Алексей Агапов салалталаах хамаанда Нерюнгрига толору састааптаах барыаҕа.
Өрөспүүбүлүкэ чиэһин араас сыллар аан дойду чемпионнара Айсиэн Мигалкин, Валерий Никаноров, Константин Жирков, Василий Захаров, Семен Борисов, Егор Атласов, Сергей Фролкин, Наталья Черноградская, Ирина Севрюк, Марина Федоренко, Саина Седалищева, о.д. а. биллэр мадьыннар туруулаһыахтара.
Кинилэри хас да тургутуулаах көрсүһүүлэр күүтэллэр. Ол курдук, Манчаары Оонньууларын икки төгүллээх абсолютнай чемпиона Эрчим Баппаҕай Калуга уобалаһыттан аан дойду түөрт төгүллээх чемпионун Иван Галкины кыайа сатыаҕа. Россия билиҥҥи чемпионкатын Лейла Шагисултанованы (Башкортостан) утары Саха сириттэн титуллаах Наталья Черноградская киирсиэҕэ. Былырыын кини бу старды аһарбыта.
105 кг интэриэһинэй киирсии күүтүллэр. Аан дойду биэс төгүллээх чемпиона Дмитрий Попов бу сезоҥҥа тохтобул ыларга быһаарыммыта. Кинини саха хамаандатыгар Манчаары оонньууларын чемпиона Семен Степанов солбуйуоҕа. Россия чемпионатыгар кини сүрүн утарсааччытынан Свердловскай уобаластан Михаил Губайдуллин буолуон сөп.
Легенда буолбут Виктор Колибабчук кыттыыта билиҥҥитэ биллибэт. Саха сириттэн олус ыарахан ыйааһыҥҥа Сергей Фролкин уонна Денис Федоров тахсыахтара.
85 киилэҕэ диэри дьахталлар ортолоругар хас да фаворитка баар. Россия чемпионатын хас да төгүллээх кыайыылаахтара Мохинур Абдузойирова уонна Калуга уобалаһыттан Анастасия Галкина кыттыахтара. Саха сирин сүүмэрдэммит хамаандатын састаабыгар быйыл уларытыылар буолуохтара — Анна Саморцева уонна Арина Турчина барыахтара.
Итиэннэ супер ыарахан ыйааһыннар ортолоругар хамаандаҕа үс төгүллээх аан дойду чемпиона Татьяна Баишева кыттыбата, кини ааспыт сылга спортивнай карьератын бүтэрэргэ быһаарыммыта. Кини лидер быһыытынан миэстэтин Вера Чичигинарова ылла.
Манна даҕатан эттэххэ, күрэхтэһии кыайыылаахтара сэтинньи бүтүүтүгэр Казань куоракка буолар аан дойду чемпионатыгар Россия сүүмэрдэммит хамаандатын састаабыгар киирэр кыаҕы ылыахтара.
Сүүмэрдэммит хамаанда састааба: 60 кг: Артур Жирков, Гаврил Никитин; 65 кг: Ариан Григорьев, Эрик Пермяков; 70 кг: Василий Чемпин, Айсиэн Мигалкин; 75 кг: Валерий Никаноров, Константин Жирков; 80 кг: Василий Захаров, Виталий Воронов; 90 кг: Семен Борисов, Егор Атласов; 105 кг: Семен Степанов, Гарри Сдвижков; 125 кг: Эрчим Баппагай, Денис Максимов; 125+ Кг: Сергей Фролкин, Денис Федоров; 55 кг: Наталья Черноградская, Ирина Алексеева; 65 кг: Ирина Севрюк, Александра Нарахаева; 75 кг: Марина Федоренко, Саина Седалищева; 85 Кг: Анна Саморцева, Арина Турчина; 85+ Кг: Вера Чичигинарова, Валерия Никифорова.
