Владивосток «Саха Сирин Тимир суоллара» акционернай хампаанньа Кубогар мас-рестлинг норуоттар икки ардыларынааҕы турнирын ыытарга бэлэмнэнэр. Помостка уон икки дойдуттан спортсменнар түмсүөхтэрэ. Оттон Саха сириттэн аан дойду чемпиона Семен Ануфриев кыттыаҕа, диэн ЯСИА иһитиннэрэр.
Мас-рестлинг үгэс курдук Владивостокка Илиҥҥи экономическай форум чэрчитинэн ыытыллар. Аан дойду күүстээх спортсменнарын күрэхтэһиилэрин балаҕан ыйын 5 күнүгэр ыытар былааннаахтар.
Бэйэлэрин маастарыстыбаларын Ангола, Египет, Замбия, Индия, Казахстан, Конго, Кыргызстан, Марокко, Монголия, Нигерия, Россия, Сирия, Туркменистан уонна Узбекистан бэрэстэбиитэллэрэ көрдөрүөхтэрэ. Кыттааччылар ортолоругар аан дойду чемпионаттарын хас да төгүллээх призердара кэлэллэрэ күүтүллэр. Россия сүүмэрдэммит хамаандатын састаабыгар икки спортсмен — Саха сириттэн Семен Ануфриев уонна Москваттан Дарья Миронова киирдилэр.
Турнир балаһыанньатыгар олоҕуран, 16 кыттааччы сэрэбиэй тардар, ол түмүгүнэн түөрт хамаандаҕа арахсыахтара. Хас биирдиилэригэр түөртүү спортсмен — икки эр киһи (80 киилэҕэ диэри) уонна икки дьахтар (65 киилэҕэ диэри) бааллар. Хапсыһыылар төгүрүк ситиминэн «истиэнэ истиэнэҕэ» киэбинэн ыытыллыахтара.
Саамай элбэх баалы ылбыт дьон кыайыылаахтар буолуохтара. Кинилэри кубоктарынан, мэтээллэринэн, дипломнарынан уонна анал бириистэринэн наҕараадалыахтара.
This post was published on 28.08.2025 12:04 12:04