СӨ култуураҕа уонна духуобунай сайдыыга миниистирин бастакы солбуйааччы Мария Турантаева салалтатынан ыытыллыбыт куонкурус хамыыһыйатын мунньаҕа кыайыылаахтары икки номинацияҕа — гимн тиэкиһин бырайыагын уонна мелодиятын оҥорууга арааран быһаарда.
Куоластааһын түмүгүнэн “Манчаары оонньуулара” мелодия бырайыагын кыайыылааҕынан “Айар уустар” Дьокуускайдааҕы креативнай индустрия кэллиэһин бастакы кууруһун устудьуона Ариана Егоровна Решетникова буолла. Тиэкис барылын кыайыылааҕынан «ОДО» этнокомплекс дириэктэрин солбуйааччы Дьулустаан Афанасьевич Толстяков ааттанна.
Кыайыылаахтар иккиэн хас биирдии бырайыактарыгар — гимн тиэкиһигэр, мелодиятыгар кырааматалары уонна 20 000 солкуобай суумалаах харчынан бириэмийэтин ылыахтара.
Дьулустаан Толстяков
Сайыммытын уруйдаан
Бастыҥ дьону быһаарар
Түһүлгэҕэ киирдибит.
Үйэлээх үгэс буолбут
Норуот таптыыр күрэҕэ
Саха омук сүрэҕэр.
Номох буолбут убайбыт
Сүдү-сүҥкэн кылаата
Манчаары оонньуулара
Саха спордун чыпчаала
Кэрэ куону сырсаннар
Сүүрүүктэр түһүннүлэр,
Мас тардыһыы, хапсаҕай,
Соноҕостор көттүлэр.
Саха дьонун бастыҥа
Манчаарыны уруйдаан,
Маннык үрдүк таһымҥа
Кыайыылааҕы айхаллаан!
Источник: Саха сирэ саайт
