Вице-премьер Сергей Местников эппитинэн, «Манчаары оонньууларыгар» бэлэмнэнии финишка чугаһаата. Ытык-Күөлгэ сотору кэминэн спорт эбийиэктэрэ тутуллуута уонна күрэхтэһиилэр кыттыылаахтарын уонна ыалдьыттар олорор сирдэрин бэлэмнээһин түмүктэнэр.
Спартакиадаҕа сүүрэр суоллаах стадион уонна элбэх хайысхалаах чэбдигирдэр-спортивнай комплекс Ытык-Күөлгэ, физкультурнай-чэбдигирдэр аһаҕас тииптээх комплекс Боробулга, Чөркөөххө спортсаала уонна Ытык Күөлгэ ипподром үлэҕэ киириэхтээхтэр. Спартакиадаҕа бэлэмнэнии чэрчитинэн, 100 миэстэлээх интернаттаах 450 миэстэлээх оскуола тутулунна.
«Манчаары оонньуулара Таатта улууһугар буолар диэн докумуоҥҥа Ил Дархан Айсен Николаев илии баттаабытын кэнниттэн түөрт сыл ааста. Бу кэм устата элбэх үлэ ыытылынна, спортивнай уонна социальнай инфраструктура оҥоһулунна. Билигин Ытык-Күөлгэ 1000 миэстэлээх ураты стадион тутуллар, трибуналаах. Манна сүрүн оонньуулар ыытыллыахтара: хапсаҕай, мас-рестлинг, сахалыы ыстаҥа, сүүрүү, национальнай многоборье, өрөгөйдөөх арыллыыта уонна сабыллыыта. Тутуу туолуута 70 бырыһыан, оонньуулары көрсө эбийиэктэр бары бэлэм буолалларыгар эрэллээхпит», — диэтэ Сергей Местников.
Хаартыска: www.sakha.gov.ru
Дьокуускайдааҕы тэрээһин кэмигэр Оонньуулар өрөгөй ырыаларын уонна талисманнарын көрдөрдүлэр, сахалыы терминнары кэпсээтилэр, сувенирдар быыстапкалара буолла, спорт көрүҥнэригэр маастар-кылаастар ыытылыннылар.
