«Спартакиадаҕа бэлэмнэнии кыраапык быһыытынан баран иһэр. Ил Дархан Айсен Николаевка спартакиадаҕа бэлэм хаамыытын иһитиннэриэхтээхпит. Хаалбыт күннэргэ түмүктүүр түһүмэҕи хайысхаларынан суһаллык быһаарыахха наада», — диэтэ Сергей Местников.
Ытык-Күөлгэ ыалдьыттары уонна кыттааччылары түһэриигэ 36 эбийиэк уонна аһатыыга 8 эбийиэк бэлэмнэнэр. Билигин Госпожнадзор уонна Роспотребнадзор хонтуруол, бэрэбиэркэ үлэтин ыыталлар.
Сүүрэр суоллаах стадион, элбэх хайысхалаах чэбдигирдэр- спорт комплекса, ипподром тутуулара бүтэн эрэллэр. Маны сэргэ Чөркөөххө модульнай спорт саалата дьэндэйэр. Сорох күрэхтэһиилэр Таатта лицейын спортивнай былаһааккатыгар ыытыллыахтара. Спартакиаданы көрсө Ытык Күөлгэ 450 миэстэлээх оскуола тутуллубута, интерната 100 миэстэлээх.
Спортсменнары наҕараадалааһын элбэх хайысхалаах чэбдигирдэр- спорт комплексыгар ыытыллар, манна анал былаһаакка баар буолуоҕа.
XXII Спартакиада кэмигэр бэс ыйын 25–26 күннэригэр Дьокуускайга «Игры Манчаары: преемственность поколений в развитии национальных видов спорта – 2025» Россиятааҕы научнай-практическай конференция ыытыллыаҕа, норуоттар ардыларынааҕы таһымнаах тэриллиэҕэ.
«Манчаары оонньуулара» от ыйын 7 — 12 күннэригэр Таатта улууһун Ытык Күөлүгэр буолуоҕа. Спорт 11 көрүҥэр күрэхтэһиэхтэрэ: хапсаҕай, мас-рестлинг, сахалыы ыстаҥа, чэпчэки атлетика, национальнай многоборье, хотугу многоборье, остуол оонньуулара, гиревой спорт, буулдьанан ытыы, оҕунан ытыы, ат сүүрдүүтэ.
This post was published on 23.05.2025 17:08 17:08