Максим Аммосов 125 сыллаах үбүлүөйүнэн уонна Саха АССР 100 сылынан Москваҕа мас-рестлиҥҥэ аһаҕас турнир тэрийэллэр. Күрэхтэһиигэ дойду кииниттэн күүстээх спортсменнар кытталлара күүтүллэр, диэн СИА иһитиннэрэр.
Күрэхтэһии кыайыылаахтара уонна призердара сыаналаах бириистэринэн, мэтээллэринэн, грамоталарынан наҕараадаланыахтара. Күрэхтэһии эр дьон ортотугар — 75, 90, 125 кг диэри, ону тэҥэ дьахталларга 65 уонна 85 киилэҕэ диэри буоллаҕа. Баарҕалаахтар бары кытталлара көҥүллэнэр.
Турнир тэрийээччилэринэн Бүтүн Арассыыйатааҕы мас-рестлинг федерацията, Нам улууһа, спорт национальнай көрүҥнэрин өрөспүүбүлүкэтээҕи киинэ, Москваҕа баар мас-тардыһыытын федерацията буолаллар.
Бэлиэтээн эттэххэ, Коломенскайга бу күн үгэс буолбут Ыһыах бырааһынньыгын тэрийиэхтэрэ.
