Майыар национальнай нэҺилиэгэр дьон үлэҕэ көхтөөх. Олохтоох бэйэни салайыныы тэрээһинэ былаан быһыытынан баран иһэр.
Билигин кэбэргэнэлэргэ 64 төбө сүөҺү, 130 төбө сылгы баар. Окко былааммыт 212 туонна, кэтэхтэр номнуо бүппүттэр, бааҺынай хаҺаайыстыбалартан «Айылгыттан», «Уллуҥнаахтан», ыраахтарынан сибээстээн, төһө оттоммутун туһунан иһитиннэриини суох.
Уон көстөөх «Араҥас» учаастагар «Искра» бааҺынай хаҺаайыстыбатыгар Федор Рязанскай ыстаадатыгар уола Николай, А.И. Захаров, А.А. Слепцов табалары көрөллөр. Сайыҥҥы кэмҥэ кинилэргэ көмөҕө Г.С. Яковлев баар. ТабаҺыттар спутниковай сибээҺинэн кэпсэтэллэригэр учаастак эргин бөрө үөрэ элбэҕин этэллэр. Онон балаҺыанньа уустук буолбута чуолкай.
Кыстыкка бэлэмнэнии үлэтэ кыраапык быҺыытынан этэҥҥэ түмүктэнэн эрэр. Тэрилтэлэр үп-харчы суоҕуттан кыралаан быстах өрөмүөн үлэтин ыыттылар. НэҺилиэккэ киирии аартыгар айылҕаттан айдарыылаах мындыр уус Аркадий Ильич Жирков үс сэргэни оҺуордаан-ойуулаан туруорда. Онон Кэбэргэнэ биир кэрэ көстүүлээх миэстэтэ буолла.
Дьокуускайдааҕы сибээс коллеһын 3-с куурсун устудьуона Денис Хабаров «Фазенда» микро-оройуоҥҥа Wi-Fi сибээс туруоран олохтоохтор махталларын ылла. Олохтоох эдэр киһи дьонугар-сэргэтигэр көдьүүстээҕи эрэ оҥорбут киҺи диэн санаалааҕа барыбытын үөрдэр.
Бу күннэргэ олорор сири тупсарыы чэрчитинэн нэҺилиэккэ эбии 15 светодиоднай лаампалар туруоруллуохтаахтар.
This post was published on 31.08.2018 14:04 14:04