Саха сиринээҕи нэһилиэнньэ дьарыктаах буолуутугар судаарыстыбаннай кэмитиэт көһө сылдьар кэллиэгийэтин чэрчитинэн Мэҥэ Хаҥалас улууһун Майаҕа сэлиэнньэтигэр идэ бэстибээлэ ыытылынна. Тэрээһин сыала-соруга – идэлэри билиини кэҥэтии уонна үөрэнээччилэри уонна ыччаты идэни өйдөөн талыыга көҕүлээһини үрдэтии.
«Бэстибээл биир сүрүн өттүнэн «Погружение в мир профессий» практическай хайысхалаах былаһаакка буолла, онно 11 үлэни биэрээччи маастар-кылааһа тэрилиннэ, үлэ араас эйгэтин уратытын дьэҥкэтик көрдөрдүлэр. Кыттааччылар исписэлиистэр үлэлэрин кэтээн көрөр эрэ буолбакка, бэйэлэрэ хайа эмэ идэ бэрэстэбиитэлин оруолугар холонор кыахтаннылар», – диэн бэстибээл тэрийээччилэрэ бэлиэтээтилэр.
Маны сэргэ бэстибээл чэрчитинэн үөрэх тэрилтэлэриттэн «Куда пойти учиться — мой выбор» профориентационнай былаһаакка үлэлээтэ, онно 13 үөрэх тэрилтэтин бэрэстэбиитэлэ бэлэмнэнии хайысхаларын, киирэр усулуобуйаларын уонна инникитин үлэҕэ киирэр кыахтарын туһунан кэпсээтилэр. Тэрээһиҥҥэ барыта 260 оскуола үөрэнээччитэ, улуус ыччатын 50 бэрэстэбиитэлэ уонна көрөөччү быһыытынан кэлбит 66 киһи кытынна.
Ыччат идэни таларыгар туһуламмыт чаҕылхай презентациялар, интерактивнай квизалар уонна да атын үлэлэр ыытылыннылар. В.П. Ларионов аатынан Майа орто оскуолатын үөрэнээччилэригэр өрөспүүбүлүкэ министиэристибэлэрин уонна дьарыктаах буолуу судаарыстыбаннай кэмитиэтин бэрэстэбиитэллэрэ кыттыылаах «Диалог на равных» киэбинэн кылаас чаастара тэрилиннилэр. Оскуола оҕолоро регионҥа саамай наадалаах идэлэр уонна экономика тутаах салааларыгар үлэҕэ киирии туһунан иһиттилэр.
