23 От ыйа 23.07
  • 21°
  • $ 87,78
  • 95,76

Майаҕа Василий Жирков приют оҕолорун циркэҕэ босхо сырытыннарар

19:07, 29 ноября 2018
Текст:
Читайте нас на
Яндекс Новости
ЯДВ

Үтүө санаалаах Василий Жирков, бэйэтэ эдэр ыал амарах аҕата, көрүүтэ-истиитэ суох буолан анал тэрилтэ көрүүтүгэр сылдьар оҕолору циркэҕэ босхо сырытаннарар. Кини манан «идэтийбитэ» хаһыс да сыла буолбут. Майа сэлиэнньэтигэр көһө сылдьар циркэлэр гастроллуу кэллэхтэринэ, социальнай-реабилитационнай киин оҕолорун  хайаан да сырыттыннарар.


«Циркэ, циркэ кэлбит!» — Майа оҕолоругар  улахан үөрүүлээх сонун ватсабынан, өҥнөөх реклама кумааҕынан  сэлиэнньэни биир гына тарҕанна.  Үгүс оҕо сонун кыылы-сүөлү көрөөрү, көрүдьүөскэ, үөрүүгэ кыттыһаары эрдэттэн турунуу, өрө күүрүү бөҕөтө буолла.

Арай сокуоннай саастарын ситэ илик оҕолорго аналлаах социальнай приютка циркэ эрэ, туох эрэ: ийэтэ-аҕата суох барахсаттар күннээҕи  олохторо биир кэм устар. Ким кинилэри ол ыарахан сыаналаах циркэҕэ сырытыннарыай? Биир оҕо барар буоллаҕына, 15 оҕону матарбакка барыларын  илдьиэххэ, көрдөрүөххэ наада.

Арай биир күн «Дириэктэргит баар дуо?»  —  диэбитинэн биир сэмэй баҕайы эдэр киһи кэбиниэккэ киирэн  кэлбит уонна бугун хас оҕолооххутуй диэн сураспытынан барбыт.  Салайааччы туһааннаах үөрэх тэрилтэтиттэн кэлэннэр оҕолору ыйыталаһаллар буоллаҕа диэн хап-сабар эппиэттэспит. Салгыы: «Оҕолору циркэҕэ босхо сырытыннарыам этэ», — диэн соһуччу этиилээх буолбут. Көҥүллүөҥ суоҕа диэбиттии: «Мин уруккуттан эһиги оҕолоргутун босхо сырытыннарааччыбын ээ», — диэбит.

Билиҥҥи курдук уустук, ыарахан кэмҥэ атын дьоҥҥо үтүөнү оҥорор дьон сэдэхтэрэ бэрт. Кинилэр тугу да харда эрэйбэккэ көмөлөһөр дьаһаныылара үгүс киһиэхэ өйдөммөт. Били куорат бөҕүн хомуйааччы Антон Васильевы да ылан көрүөх.  «Эркээйи» хаһыат кэрэспэдьиэнэ Майа амарах сүрэхтээх киһитин кытта кэпсэттэ.

— Мин Жирков Василий Павлович диэммин. Приют оҕолорун циркэҕэ сырытыннарбытым үһүс сыла буолла ээ…

— Били «Шапито» диэн саамай чэпчэки билиэтэ 700 солкуобайдаах Москва циркэтигэр эмиэ эн сырытыннарбытыҥ дуо?

— Ээ, сырытыннаран. Сылга үс-түөрт циркэ кэлэн барар буоллаҕына, барытыгар матардыбакка сырытыннарааччыбын.

— Эн эбиккин дии оччоҕо, ол босхо сырытыннарар үтүө санаалаах киһибит! Бэйэҥ тулаайах улааппытыҥ дуо, ол иһин маннык оҕолорго көмөлөһөр санааҕа кэллэҕиҥ?

— Ээ, суох. Ийэлээхпин, аҕалаахпын. Бэйэм ис сүрэхпиттэн тулаайах оҕолору аһынабын. Мин оҕолорбун син онно-манна сырытыннаран, үөрдэр-көтүтэр буоллахпына, бу кэмҥэ приют  оҕолоро тоҕо оҕо саас дьолуттан матыахтаахтарый? Ол эрэ санааттан бэйэбэр итинник быһаарыныы ылыммытым. Василий  Жирков Майа ДьУоКХ-тыгар операторынан, кэргэнэ Хара оскуолатын остолобуойугар үлэлииллэр эбит. Эдэр ыал үс оҕолоохтор, онтон саамай кыралара — иккилээх. Дьиҥинэн, тыа сирин боростуой олохтооҕор ордук харчы диэн суоҕун кэриэтэ буоллаҕа, ону бары да билэбит. Ол гынан баран күннээҕи бэйэ кыһалҕатын туора тутан, атын кыаммат-түгэммэт оҕолору санаан, кинилэргэ анаан үтүөнү оҥоруу — биһиги кэммитигэр чахчы сэдэх көстүү. Онон Василийга, кини дьиэ-кэргэнигэр үтүөнү онорбуккут сүүс төгүл үтүөнэн эргилиннин диэн баҕа санаа бастыҥын аныыбыт!

 Ааптар: Валерия БАИШЕВА

Следите за самым важным и интересным в Telegram-канале и WhatsApp-группе ЯСИА