Владимир Ларионов аатынан Майа орто оскуолатын агроблогун маастардара арассаада бэлэмнииллэр. Кылаастарынан арааран үүнээйи араскыларын таттараллар. Ону кытта сэргэ бастакы оҕурсуларын быстылар.
Агроблок оҕолоро бу күннэргэ оскуола түннүгэр үүннэрбит бастакы оҕурсуларын быстылар. 6 «б” кылаас үөрэнээччитэ Настя Черкашина агрочаас уруогар сөбүлээн дьарыктанар. Кини үүнээйилэри көрөрүн, бүөбэйдиирин туохтааҕар да ордорор. Кыыс, өссө олунньу ыйга түннүккэ үүннэриллибит оҕурсуну, биир бастакынан быһар чиэскэ тигистэ.
Үөрэнээччилэр учууталларын кытары күөх үүнээйи араас көрүҥүн, оҕуруот аһын, сибэккилэри арассаадалаан, сааскы түбүккэ сылдьаллар.
Үлэ үөрэх маастара Розалия Васильева кэпсииринэн, быйыл дьыл хойутаан, халлаан тымныытыттан, теплицаҕа үлэ хойутаата. «Халлаан сылыйдар эрэ кыраапыгынан субуотунньуктар саҕаланыахтара«, — диэтэ кини.
Оҕолор, учууталлар уонна үлэһиттэр бары күргүөмнээхтик, тэрээһиннээхтик үлэлээн, 22 тыһыынча кэриҥэ арассааданы олордон, аны саас ыам ыйыгар бастакы быйаҥы нэһилиэнньэҕэ атыыга таһаарыахтара.
Агрооскуола сылтан сыл аайы күөх үүнээйи көрүҥнэрин элбэтиигэ тэрээһиннээх үлэни ыытар, диэн суруйда Зоя Герасимова https://www.instagram.com/gazetaerkeii/
This post was published on 16.04.2021 14:01 14:01