Санкт-Петербург куоракка, Арассыыйа этнографическай түмэлигэр V Норуоттар икки ардыларынааҕы «Фолк-Звезда» толорор искусство Бириэмийэтэ уонна IX «Снежные узоры Якутии» декоративнай-прикладной искусство быыстапката киэҥ далааһыннаахтык буолан ааста. Бу тэрээһин дойдуга Арассыыйа норуоттарын сомоҕолоһууларын» уонна Саха Өрөспүүбүлүкэтигэр Култуура сылын чэрчитинэн ыытылынна.
Ол курдук «Фолк-Звезда» Бириэмийэ кыттааччылара тэрээһин аһыллыытын кэмигэр «La Ma» дуэт — Роман уонна Иринджан Овшиновтар-Куулгазын (Москва к.), Сергей Дубовиков (Нижняй Новгород к.), Саина Струкина (Санкт-Петербург к.), этно ырыаһыт Кыталы Куо (Дьокуускай к.), оһуохай этээччи Денис Оконешников (Мэҥэ-Хаҥалас улууһа), «Жингэчэй» фольклорнай ансаамбыл (Пермскай кыраай), «Северное сияние» тыйаатыр-студия (Санкт-Петербург к.), «Алаҕар Далбардара» түмсүү (Чурапчы улууһа) уонна Дьокуускай куорат «Арчы Дьиэтэ» киинин иһинэн үлэлиир «Мааны Мандар» иис маастардарын студията (сал. Туйаара Алыптаах, Любовь Константинова) дьон болҕомтотун тартылар.
Чуолаан «Мааны Мандар» иистэнньэҥнэр студиялара «Өбүгэ ситимэ» — далбар хотуттар уонна эр бэртэрэ күннээҕи олоххо кэтиллэр сахалыы аныгылыы моһуоннаах таҥастарын кэллиэксийэтин, «Удьуор тутума» — төрүт иискэ олоҕуран тигиллибит аныгылыы таҥалай кэһиэччик араастарын, «Сааскы Дьэргэлгэн» — сиэдэрэй симэх кэллиэксийэтин көрдөрөн, үрдүк биһирэбили ыллылар. Маны сэргэ быыстапкаҕа сахалыы тыыннаах эгэлгэ оҥоһуктарынан ситиһиилээхтик кыттан, дьон-сэргэ кэрэхсэбилин ыллылар.
Олунньу 7 күнүгэр «Мааны Мандар» иис түмсүүтэ V «Фолк-Звезда» Бириэмийэ «Мода тыйаатыра» түһүмэҕэр 2025 сыллааҕы кэллиэксийэтин көрдөрдө. Ол курдук 16-18-с үйэтээҕи өбүгэлэрбит кэтэ сылдьыбыт «Таҥалай соннорун» уонна төрүт симэхтэргэ олоҕуран аныгылыы тигиллибит «Өбүгэ ситимэ» кэллиэксийэлэрэ дьүүллүүр сүбэ үрдүк сыанабыл ылан, I истиэпэннээх Лауреат аатын ылары ситистэ. Ааптарынан — СӨ норуотун уус-уран оҥоһуктарын маастара Туйаара Алыптаах буолар.
IX «Снежные узоры Якутии» быыстапка түмүгүнэн «Мааны Мандар» иис түмсүүтэ «За уникальную коллекцию в этностиле» анал ааты ылары ситистэ. Ону таһынан иистэнньэннэр — Варвара Дьячковская, Светлана Щукина, Оксана Жиркова, Валентина Яковлева, Катерина Каратаева, Наталья Атакова, Любовь Константинова уонна Туйаара Алыптаах «Бастыҥ маастар» үрдүк аакка тиксэн, үөрүүлэрэ өссө бүк үрдээтэ.
Олунньу 9 күнүгэр А.И.Герцен аатынан Арассыыйа судаарыстыбаннай педагогическай университет Хотугу норуоттар институтугар саха төрүт култууратын күннэригэр «Мааны Мандар» иис түмсүүтүн маастар-педагогтара Туйаара Алыптаах, Любовь Константинова уонна Варвара Дьячковская кыбытык тигии уонна суһуох симэҕин оҥоруу кистэлэҥнэрин арыйар маастар-кылаас ыыттылар итиэннэ сахалыы сиэдэрэй симэхтэри уонна дьөһөгөй оҕотун толору симэҕин быыстапкаҕа туруордулар.
Бу дьоро түһүлгэни Дьааҥыттан төрүттээх бэстэбээл кыттыылааҕа, фольклорист Саргылана Слепцова төрөөбүт түөлбэтин ырыатынан-тойугунан уонна фольклорунан киэргэттэ.
Тэрээһиннэр түмүктэринэн «Мааны Мандар» түмсүү салайааччыта Любовь Константинова бу курдук санаатын кытта үллэһиннэ:
«Дойдубут киин куораттарыттан биирдэстэригэр анаан-минээн «Снежные узоры Якутии» быыстапка тэриллибитэ олус суолталаах. Санкт-Петербург куорат олохтоохторо эрдэттэн бириэмэлэрин аттаран, тэрээһиннэргэ кэлэн саха төрүт ииһин, оҥоһуктарын сөҕө-махтайа, кэрэхсии көрдүлэр. Ону таһынан саха таҥаһа хайдах тигиллэрин туоһуластылар, интэриэһиргээн ыйыттылар. Ол онтон биһиги сүргэбит өссө көтөҕүлүннэ, салгыы айарга-тутарга күүс эбилиннэ».
Бу курдук саха мааны далбардара, уран тарбахтаахтара кыайыы көтөллөөх, иэйии аргыстаах Саха сиригэр төнүннүлэр.
Ааптар: Анфиса Слепцова,
РФ суруналыыстарын Сойууһун чилиэнэ,
Санкт-Петербург к.
