Бэнидиэнньиккэ сарсыарда Дьокуускай куоракка суолга 25 быһылаан таҕыста диэн, региональнай ГИБДД СИА-ҕа иһитиннэрдэ.
«Бүгүн сарсыарда инспектордар суолга биэс тырааныспар быһылаанын бэлиэтээтилэр, 20-тэн тахса түбэлтэни «Госуслуги Авто» сыһыарыы боротукуоллаата. Саахал сүрүн биричиинэтинэн суоппардар дистанцияны тутуспатахтара уонна түргэн тэтимнээх айаннаабыттара буолла»,- диэн биэдэмистибэ пресс-сулууспатыгар иһитиннэрдилэр.
Бары суоппардары суол быраабылатын тутуһалларыгар, хаамыраларын кыһыҥҥы вариаҥҥа уларыталларыгар ыҥыраллар. Ордук бу кэмҥэ саҥа саҕалыыр суоппардарга сэрэхтээх. Кинилэр суол быһылааныгар быдан элбэхтэ түбэһэллэр, тоҕо диэтэххэ, билиҥҥитэ массыынаны салайар үөрүйэхтэрэ суохтар.
Сатыы дьон хайаан даҕаны анал сиринэн суолу туоруохтаахтар.
This post was published on 10.10.2022 14:03 14:03