Үүммүт сыл тохсунньу 1 күнүттэн итирдэр утахтары атыылааһын өссө ыараата. Ол курдук биир кэлим судаарыстыбаннай автоматизированнай информационнай ситим (Единая государственная автоматизированная информационная система – ЕГАИС) диэн өйдөбүл олоххо киириэҕиттэн, бу ситимҥэ холбоммотох маҕаһыыннар кууһунан атыылааччылартан кыраадыстаах утаҕы сатаан атыыласпат уонна бэйэлэрэ атыылаабат кыахтаналларын туһунан Арыгы атыытын хонтуруоллуур уонна лицензиялыыр управление салайааччытын солбуйааччы Василий Григорьев этэр.
Онон мантан инньэ оҥорон таһаарааччылар, дистрибьютордар, кууһунан, биирдиилээн атыылааччылар уонна туһанааччылар биир ситимҥэ үлэлиэхтээхтэр. Ол курдук, хас биирдии бытыылка анал федеральнай мааркалааҕын таһынан, аны штрих-кодтанар буолла. Штрих-кодка хаһыс чыыһылаҕа, хас чааска ханна оҥоһуллубута, нолуогу төлөөһүн барыта суруллар. Онон бородууксуйа собуоттан саҕалаан туһанааччыга тиийиэр диэри хонтуруолланыахтаах.
Холобур, предприниматель Дьокуускайга баар атыы-эргиэн кииниттэн арыгыны кууһунан атыылаһан баран, улууска тиийээт, анал сканерынан хас биирдии бытыылканы бэрэбиэркэлиэхтээх. Ол дааннайдарын барытын кууһунан атыылыыр маҕаһыыҥҥа ыытар. Барыта интернет нөҥүө барар. Оттон атыылыырыгар штрих-коду сканердаан баран атыылыыр. Онтуката суох кассанан сатаан аһардыа суоҕа.
Онон, арыгыны атыылыыр маҕаһыыннар бары автоматизированнай ситимҥэ холбоннохторуна, предпринимателлэр, тэрилтэлэр контрафактнай бородууксуйаны кыайан атыылаабат буолуохтара.
This post was published on 10.03.2016 17:24 17:24