Эдэр уонна кэскиллээх саха бөҕөһө Лев Павлов, күүтүллүбүтүн курдук, Дмитрий Коркин турнирыгар кыһыл көмүһү иилиннэ. Кини ЯСИА-ҕа эппитинэн, тустууттан сылайбыт, ити эрээри саҕалаабытын быраҕарга олус элбэҕи оҥорбут. Үүнэр олимпийскай эргииргэ Саха сирин эрэлэ аан дойду уонна Европа чемпионаттарыгар кыттар баҕалааҕын эттэ.
«Миэхэ ыалдьар дьоммор махтанабын. Элбэх киһи өйүү кэлбит. Улахаттар ортолоругар туох баар күүспүн ууран киирсэбин. Маннык таһымҥа үһүс эрэ тустуум. Харысхалым улахан, ити эрээри өссө үлэлиэхпин наада, сыыһаларбын көннөрөн, оччоҕуна кимиэхэ да хотторуом суоҕа. Ааспыт киирсиилэрим барыта ыарахаттар, бастаан бэйэбин кыайыахпын наада, сааһыланыахпын, сыппаан биэрэр кэмнэрбин суох оҥоруохпун»,
— диэтэ Лев Павлов.
«Кыра эрдэхпиттэн Дмитрий Коркин турнирыгар кыһыл көмүһү ылыахтаахпын билэр этим. Өрөспүүбүлүкэ турнирдарыгар бастыҥ көрдөрүүлэри оҥорбутум — Павел Пинигин турнирыттан саҕалаабытым, онтон — Роман Дмитриев турнира. Үүнэр олимпийскай эргииргэ улахан көбүөрдэргэ тахсар баҕалаахпын — аан дойду уонна Европа чемпионаттарыгар. Онно бэлэммин, миигиттэн элбэҕи күүтэллэр»,
— диэтэ Павлов.
Сиһилии ЯСИА-ҕа ааҕыҥ.
This post was published on 21.10.2024 11:01 11:01