Ленскэй улууһугар быйыл оҕуруот аһын былааны таһынан хомуйдулар. 2,5 тыһ. туонна оннугар 3 тыһ. хаппыыста уонна хортуоска хомуллубут. Хортуоскаҕа кыра хаалыы баар: 7,8 тыһ. туонна оннугар 7,6 тыһ. хомуйбуттар. Маны олохтоохтор от ыйын саҕаланыытыгар Нуотараҕа түспүт күүстээх тобураҕы кытары сибээстииллэр. Бу туһунан улуус дьаһалтата иһитиннэрэр.
Ньүүйэ нэһилиэгэр аҥардас биир фермер 150 туонна хаппыыста хомуйбут. Атыттар — 100 туоннаны. Манан сибээстээн улууска оҕуруот аһын харайар сир тутуута сытыытык турар. Улуус баһылыга Жумарт Абильманов урукку ангары уларытан тутар баҕалааҕын этэр.
«Дьиэни ититэн, климат-хонтуруоллуур систиэмэтин туруоран оҕуруот аһын өр кэмҥэ харайар буолуохпут. Пиэрмэрдэр ураһаайдарын хомуйаат, батарыы түбүгэр түһүөхтэрэ суоҕа. Эһиил күһүн дьиэни үлэҕэ киллэрэр баҕалаахпыт. Итини таһынан улуус дьаһалтата атын улуустары кытары оҕуруот аһын батарыыга сөбүлэҥ түһэрсэри салҕыа», — диир баһылык.
Быйыл Ленскэй улууһа бастакытын тыа хаһаайыстыбатын өрөспүүбүлүкэтээҕи бырагырамааларыгар кыттыыны ылбыт. Ол курдук сүөһү аһын бэлэмнээһиҥҥэ өрөспүүбүлүкэ бүддьүөтүттэн 19,7 мөл солкуобай көрүллэн: 10,7 мөлүйүөнүгэр үс улахан хаһаайыстыбаҕа 11 тиэхиньикэ, 4,8 мөл. икки хаһаайыстыбаҕа сиилэс траншеятын тутуутугар, онтон 2,4 мөл. үс хаһаайыстыбаҕа 30 км күрүө тутуутугар, ону таһынан 1,7 мөл. өссө үс хаһаайыстыбаҕа 45,5 туонна сиэмэ ылыытыгар барбыт.
Маны таһынан өрөспүүбүлүкэ суотугар 600 төбө ынах сүөһү ылыллыбыт. Итинтэн 100-һэ Батамайдааҕы хаһаайыстыбаҕа. Туҥуйдары Архангельскайтан атырдьах ыйын бүтүүтэ аҕалбыттара.
Санатабыт, Ленскэй улууһа 2021 сыл тохсунньу 1 күнүттэн тыа хаһаайыстыбатын улууһа буолар.
