Ленскэй оройуонугар үс сүппүт эр киһини булбуттар. Кинилэр ааспыт бээтинсэҕэ балыктыы тахсан баран, анаммыт бириэмэлэригэр төннүбэтэхтэр. Бэнидиэнньиккэ дьиэлэригэр кэлбиттэрин туһунан Саха сирин быыһыыр сулууспатыгар иһитиннэрдилэр.
Эр дьон Ленскэй — Мииринэй трассатыттан 78 км ыраах сиргэ балыктыы барбыттар. Алтынньы 10 күнүгэр бээтинсэ киэһэтигэр баран, алтынньы 12 күнүгэр, өрөбүлгэ, эбиэккэ төннүөхтээхтэр да биллибэтэхтэр. Балыксыттар бэнидиэнньик сарсыардатыгар төннүбэтэхтэригэр, көрдөөһүн саҕаланар.
Ленскэй көрдүүр-быыһыыр этэрээтин үс быыһааччыта уонна биир полиция үлэһитэ «Трэкол» вездеходунан көрдүүллэр. Биллибитинэн, сүппүт дьон техникалара алдьаммыт.
«23:17 чааска сүппүт дьон булулунна, техникалара алдьаммыт. Быыһыыр Сулууспа массыынатынан Ленскэйгэ кэллилэр, медицина көмөтүгэр наадыйбаттар», — диэн биэдэмистибэ пресс-сулууспатыгар иһитиннэрдилэр.
