24 От ыйа 24.07
  • 28°
  • $ 87,3
  • 95,46

Үлэ түмүгэ санааны кынаттыыр

Читайте нас на
Яндекс Новости
ЯДВ

Эдэр дьоннор ыал буоланнар алаһа дьиэни тэринэр түбүгэр түһэллэр. Хас биирдии дьиэ кэргэн дьиэтин олорорго, оҕо-уруу тэнитэргэ табыгастаах, атыттартан уратылаах, тупсаҕай гына оҥосторо саарбаҕа суох.


Мэҥэ Хаҥалас улууһун Мэлдьэхси нэһилиэгин үс оҕолоох эдэр ыаллара Семен уонна Анна Герасимовтар 2002 сыллаахха холбоспуттар. Көрүөхтэн тупсаҕай, баараҕай эркиннээх, икки мэндиэмэннээх 7 да 7-лээх, эбии тутуулаах дыбарыастыҥы дьиэни 2008 сыллаахха аҕа баһылык бэйэтин уонна чугас дьонун күүстэринэн туппуттар. Ону тэҥэ тэлгэһэтигэр сайыҥҥы дуус, ханна даҕаны суох дьэрэкээн быһыылаах баанньык итиэннэ быйыл сайын сахалыы балаҕаны туттан бүтэрэр былааннаах. Биһиги тиийбит күммүтүгэр балаҕанын бэһис эрэ күнүн тута сылдьара, ол эрээри эркиннэрин туруоран, ис-тас үлэтэ хаалбыт этэ. Саха балаҕанын эдэр ыаллар тутталлара хайҕабыллаах.

‒ 2010 сыллаахха бэйэбэр пилорама ылыммытым. Төрдүбэр биллиилээх уустар суохтар, ол эрээри дьиэбин туттан бараммын олус астыммытым, айар-тутар санаам киирбитэ, онтон ыла сайын аайы кыра-кыралаан тутуулары ыытабын, ‒ диэн эдэр ыал аҕата Семен кэпсиир.

Кэргэнэ Анна Николаевна Чурапчы улууһуттан төрүттээх, оскуолаҕа алын кылаас үөрэнээччилэрин үөрэтэр, дьиэ ис-тас үлэтигэр туора туран хаалбат, оҕуруот аһын арааһын, сибэкки эгэлгэтин олордон киэргэппит. Сибэкки арааһын олордорго аналлаах массыына көлүөһэтиттэн араас кубалары уонна да атын быһыылаах кулуумбалары оҥортолообут, өрүс тааһын хото туһаналлар эбит. Ону сэргэ Семен кыһынын хаарынан оҥоһуктары оҥорон араас көрүүлэргэ, күрэхтэһиилэргэ кыттар эбит. Кини биир сүрүн ирдэбилинэн атын дьону үтүктэ сатаабат, бэйэтиттэн уратыны эбэн-сабан биэрэр. Холобур, 2008 сыллаахха туппут күрүөтэ-хаһаата киһиттэн эрэ барытыттан уратытык, тупсаҕайдык көстөр, сахалыы тыыннаах, оһуордаах-мандардаах.

‒ Нэһилиэкпитигэр гаас киллэриллээри турар буолан, билигин онно бэлэмнэнии үлэтин ыытыахтаахпыт, гаас оһоҕо турар тутуутун оҥоруоҕум, уу-хаар киллэртэрэн, дьиэбит толору хааччыллыылаах буолуо этэ диэн баҕа санаалаахпыт, ‒ диир эдэр киһи.

Эдэр дьоҥҥо тугу сүбэлиэҥ-амалыаҥ этэй диэн ыйытыыга Семен сыал-сорук туруорунан, туохтан даҕаны толлубакка баҕа санааҕытын толорорго дьулуһуҥ, оччоҕуна, үлэ түмүгэ көһүннэҕинэ, бэйэҕит астыныаххыт уонна онтон кынаттаныаххыт диэтэ.

Следите за самым важным и интересным в Telegram-канале и WhatsApp-группе ЯСИА