Мунньахха бырабыыталыстыба бэрэссэдээтэлин солбуйааччыта Георгий Степанов кыттыыны ылла. Кини дьиэ кэргэттэри өйүүр миэрэлэр тустарынан уонна демография көрдөрүүтүн үрдэтиини кэпсээтэ. Вице-премьер Россияҕа 2025 сылтан саҥа национальнай бырайыактар саҕаламмыттарын иһитиннэрдэ.
««Продолжительная и активная жизнь», «Семья», «Кадры» саҥа национальнай бырайыактар баар буоллулар. Аныгы уопсастыбаҕа дьахтар оруолун таарыйаллар. «Демография» нацбырайыак оннугар «Семья» нацбырайыак баар буолла, манна дьахтар быраабын кытта сибээстээх федеральнай бырайыактар киирэллэр. Дьиэ кэргэни өйөөһүн, элбэх оҕолоох дьиэ кэргэн, ийэ буолууну уонна оҕо сааһы харыстааһын, кырдьаҕас көлүөнэ, дьиэ кэргэн сыаннастара», — диэтэ салайааччы.
Кини төрөөһүн кыччааһынын кыһалҕата баарын эттэ. Георгий Степанов соторутааҕыта Ил Дархан Айсен Николаев көҕүлээһининэн элбэх оҕолоох ыаллары өйүүр миэрэлэр тустарынан регионнааҕы сокуоҥҥа уларытыылар киирбиттэрин эттэ. Өрөспүүбүлүкэтээҕи «Семья» ийэ хапытаалынан 2025 сылтан үһүс уонна онтон кэлин төрүүр оҕоҕо төлөбүр оҥоһуллар буолла. Кээмэйэ бүгүҥҥү күҥҥэ 316 тыһ солк. Ил Түмэн депутаттара сокуону ылыннылар. «Дети столетия» төлөбүрү кытта холбоон 432 тыһ солк буолар. Манна федеральнайдааҕы ийэ хапытаала уонна сир учаастагын биэрии киирсэр.
Ил Түмэн социальнай бэлиитикэҕэ сис кэмитиэтин бэрэссэдээтэлэ Алена Атласова эппитинэн, 2025 сылга, ааспыт сылы кытта тэҥнээтэххэ, 1,4 төгүл хат буолууга уонна оҕону төрөтүүгэ босуобуйа кээмэйэ улаатта. Оҕо төрөөбүтүнэн биир кэмнээх босуобуйа олунньуга 26 400 солк буолла. Элбэх оҕолоох ыаллар ханнык баҕарар кэмҥэ уоппуска ылыахтарын сөп, оҕото 14 сааһын туола илик буоллаҕына, нолуоктан көҕүрэтии уонна НДФЛ сорох чааһын төнүннэрии, баайга-дуолга, сиргэ нолуоктан көҕүрэтии, ипотеканы сабыыга 450 тыһ солк ылыы курдук миэрэлэр бааллара этилиннэ. Элбэх оҕолоох ыал биир төрөппүтэ биир тырааныспарга нолуоктан босхолонор диэн эмиэ баар.
Пуорумҥа Саха сирин идэлээх сойуустарын федерациятын бэрэссэдээтэлэ Николай Дегтярев, үлэ миниистирэ Ирина Волкова, ыччат миниистирин э.т., Россия Геройа Игорь Юргин кыттыыны ыллылар.
This post was published on 05.03.2025 16:08 16:08