Бэҕэһээ, кулун тутар 13 күнүгэр, өрөспүүбүлүкэ үгүс улуустарыгар дьүкээбил дьүрүскэнэ оонньоото. «Өлүөнэ остуолбара» национальнай паарка территориятын эмиэ хапта. Учаастактааҕы иниспиэктэр Спиридон Максимов айылҕа кэрэ көстүүтүн видеоҕа хатаата, тэрилтэ телеграм-ханаалыгар таһаарда.
Национальнай паарка кэпсээбитинэн, «Игра престолов» культовай киинэ тимир трона кинилэргэ кэллэ.
Арт-эбийиэги Саха сиринээҕи художественнай училище уонна Россия худуоһунньуктарын Союһун чилиэннэрэ Валентина Никифорова уонна Мария Уваровская оҥордулар. Трон үрдүгэ 2,5 м, олоҕун кээмэйэ — 150 х 120 см. Тимиртэн икки нэдиэлэ устата таҥылынна, фанеранан уонна пеноплексонунан тастанна. Декоративнай штукатурканан уонна эпоксиднай сымаланан киэргэтилиннэ.
Санаттахха, Өлүөнэ остуолбаларыгар туристическай сезон кулун тутар 1 күнүттэн саҕаламмыта.
This post was published on 14.03.2025 10:01 10:01