Өлүөнэ очуостарын тэллэҕэр кулун тутар 19 күнүгэр «Азия оҕолоро» VIII норуоттар ардыларынааҕы оонньуу уота умайда. Эстафета маршрута өрөспүүбүлүкэ бары оройуонун хабар уонна 100 хонугунан Дьокуускай куоракка оонньуулар арыллар өрөгөйдөөх күннэригэр фиништиир.
«Азия оҕолоро» оонньуу уота Өлүөнэ очуостарын территориятыгар алгыс кэнниттэн уматылынна. Церемонияҕа Ил Дархан Айсен Николаев, Россия Олимпийскай кэмитиэтин президенэ Станислав Поздняков, олимпийскай чемпионнар уонна призердар, аан дойду хоккейын лидердара Евгений Давыдов, Алексей Касатонов, Сергей Шепелев, олимпийскай чемпионкалар Лилия Ахимова, Анна Богалий уонна да атын спорт сулустара бааллар.
«1996 сыллаахха бастакы президент Михаил Николаев аан дойдуга бу үтүө оонньуулары бэлэхтээбитэ. Ону бүгүн биһиги көрөбүт, Саха сирин уонна Россия символлара буолаллар. Бу оонньууларга аан дойду уонунан араас дойдуларыттан оҕолор мусталлар. Санкциялар буолбуттарын да иһин, биһиги дойдубут уонна Саха сирэ дьиҥнээх спортсменнары ыҥырар кыахтаах, тоҕо диэтэххэ, биһиэхэ ыраас, кырдьыктаах, мөккүөрэ суох киирсии бары быраабылаларынан ыытыллар. Спорт эйэ уонна доҕордоһуу аатыгар дьону түмэр. «Азия оҕолоро» VIII оонньуулар саамай үрдүк таһымҥа ыытыллалларыгар эрэллээхпин», — диэтэ Айсен Николаев.
Станислав Поздняков Саха сирэ физическай культураҕа уонна спортка улахан болҕомтотун уурарын бэлиэтээтэ. Икки төгүллээх олимпийскай чемпион Вячеслав Фетисов оонньуулары ыытыылар үгэскэ кубулуйан, өссө да салгыы бара туралларыгар баҕарда, бастыҥ спорсменнары уонна дойду дьиҥнээх патриоттарын бэлэмниир, иитэн таһаарар аналлааҕын эттэ. Кэмитиэт президенэ Владимир Максимов оонньуулары Саха сирэ бары күүтэрин, оонньуулар норуоттар ардыларынааҕы таһымнааҕын уонна спортсменнары бэлэмнииргэ трамплин буоларын эттэ.
This post was published on 20.03.2024 09:35 09:35