Сааскы маҥнайгы ичигэс күннэр туруохтарыттан Өлүөнэ муостатын тутуу былаһааккаларыгар сэргэхсийии — улуу эбэ Хаптаҕай-Табаҕа туһаайыытынан хаҥас уонна уҥа кытылларга модун тиэхиньикэ мотуорун тыаһа күннэри-түүннэри ньиргийэн олорор, суруйда Саха парламент саайт.
Бу күннэргэ өрүс Табаҕа өттүнээҕи хаҥас кытылыгар саамай уустук уонна эппиэтинэстээх кэрдиистэртэн биирдэстэрэ саҕаланна– 10 №-дээх тирэх бастакы коффердамын өрүс сүнньүгэр туруоруллуохтаах сиригэр чугаһатыы. 
Бу баараҕай тутууну ааспыт сылы тиргиччи уонна бу сыл 3 ыйын устатын тухары таҥан бүтэрдилэр. Сүдү конструкция үрдүгэ 17 миэтэрэ, туоратын кээмэйэ 38 миэтэрэ, уопсай ыйааһына 2,8 тыһыынча туонна. Улахан тутууну хас да суукка устатыгар кытылтан 8,8 миэтэрэ аллараа түһэрэн, 140 миэтэрэни состороллор. Хамсааһын бары кэрдиистэринэн «ВИС» бөлөх исписэлиистэрэ хонтуруолу ыыталлар, үлэ сырдык кэмҥэ эрэ ыытыллар.
Уста сылдьар коффердамнар Өлүөнэ эбэни туоруур муоста 3 баараҕай пилонун тирэнэр тирэхтэрин оҥорорго туһаныллар тутуулар. Бу ортото көҥдөй тутуулары (коффердамнар) эбэ хаба ортотугар уонна киниттэн биир кээмэйдээх тэйиччилээх уҥа уонна хаҥас өттүнээҕи туочукуларга туруохтаах сирдэригэр соһон илдьэн туруораллар. Оннун булбутун кэннэ көҥдөйгө хаайтарбыт эбэ уутун төттөрү хачайдаан ылаллар уонна ол оннугар салгыы баржаларынан цемент, бетон аҕалан кутан иһэллэр. Олору ыстаал тимир арматуранан баайан туттаран иһэллэр. Оннук гынан өрүс будулуйар сүүрүгүн ортотугар улуу муоста эбэ төрүт ньыгыл түгэҕиттэн тирэммит 3 сыбаайа-тирэҕэ оҥоһуллан тахсан кэлиэхтээхтэр. Итинник 3 коффердам оҥоһуллара былааҥҥа турар. Бастакы ити таҥыллан бүтэн, туруохтаах сирин булардыы хоҥунна, иккиһи бу кыһын саҥа дьылтан таҥан саҕалаатылар диэн биллэрэллэр.
Пилоннар диэн муоста 3 сүрүн сүдү тирэҕин уу үрдүнээҕи чааһын ааттыыллар. Бу пилоннар муостаны тутан турар ыстаал вантовай торуостары холбооттуур, туттартыыр эппиэттээх ноҕуруусканы толороллор. Хартыыналарга Өлүөнэ муостатын саамай кыраһыабайдык көстөр чааһа дииллэр. Тирэх уу аннынааҕы чааһа муоста конструкциятын барытын сүгэн турар уонна саас муус барыытыгар, күһүн кыдьымах кииритиигэр, муус туруутугар суоттаммыт бары ноҕуруускалары тулуйуохтаах.
Муостаны тутуу быраактыкатыгар бу аан дойдуга аан бастаан туттулар технология диэн сыаналыыллар. Майыгынныыр технологиялар уруккуттан туттулаллар эбит да, ымпыгар-чымпыгар киирдэххэ, уратыта элбэх диэн быһаараллар
