Мэҥэ Хаҥалас оройуонугар муус суол арылла илигинэ көҥүлэ суох дьону массыыналарынан тиэйбит икки суоппар холуобунай дьыалатын суукка тиксэрдилэр. Ол туһунан Саха сирин борокуратуурата иһитиннэрдэ.
Суоппардар РФ ХК 238 ыст. 1 ч. буруйданаллар — дьон олоҕор эбэтэр доруобуйатыгар кутталы үөскэтэр үлэни толоруу эбэтэр өҥөнү оҥоруу иһин.
ГИБДД иниспиэктэрдэрэ сэтинньи 26 уонна 27 күннэригэр Өлүөнэ эбэ уҥа биэрэгэр буруйу кэһээччилэри туттулар. Суоппардар алта пассажиры төлөбүр иһин таспыттар, кинилэр ити кэмҥэ Дьокуускай — Аллара Бэстээх хайысханан муус суола арылла илигин билэллэрэ.
Бу буруйдарын иһин икки сылга диэри көҥүллэрэ быһыллыан сөп, суруйар борокуратуура.
