Өлүөхүмэ улууһугар ЧС режимэ биллэрилиннэ, манна 640 гектар иэннээх улахан ойуур баһаара умайа турар, баһаары умулларыыга 78 киһи, 7 тиэхиникэ үлэлиир.
Баһаар Чапаев нэһилиэгиттэй 10 км тэйиччи буола турар. Бастаан утаа иэнэ 0,5 гектар этэ эрээри, олохтоох дьаһалта ылыммыт дьаһаллара ситэтэ суох буолан, бу күннэргэ 620 гектарга тиийэ улаатта, онтон 300 гектара — үрдүнэн барар баһаар буолла.
«Итинэн сибээстээн оройуон сиригэр-уотугар авиационнай патруллааһын мэлдьи ыытыллар. ЫБМ надзорнай уорганнара, ойуур инспектордара уонна ис дьыала уорганнара сири патрулууллар. Ойуур баһаара тахсыбатын туһугар бар дьону тыаҕа сэрэхтээх буоларга ыҥырабын», — диэтэ экология миниистирин солбуйааччы Андрей Коноплев.
Саха сирин сиригэр- уотугар баһаартан сэрэхтээх буолуу сезона саҕаланыаҕыттан 24 ойуур баһаарын бэлиэтээтилэр, баһаар иэнэ барыта 931,9 гектар. Саха сиригэр бэс ыйын 7 күнүнээҕи туругунан 3 ойуур баһаара умайа турар, ол иһигэр Ленскэйгэ 42 гектар иэннээх биир баһаары умулларбыттар, баһаары утары 21 киһи үлэҕэ тардыллыбыт. Өссө биир баһаар Амма оройуонугар 7 гектар иэннээх сиргэ сытар, манна баһаар тарҕаныытын тохтоппуттар, онуоха 21 киһи үлэҕэ тардыллыбыт.
Кэнники сууккаҕа баһаартан сэрэхтээх буолуу күүһүнэн 59,5 гектар иэннээх 3 ойуур баһаарын умуруордулар. Өрөспүүбүлүкэ сирин-уотун улахан улахан аҥаарыгар баһаартан сэрэхтээх буолуу III кылаастаах таһымнаах.
