Өлүөхүмэ улууһугар Арассыыйа ИДЬМ-тин силиэстийэлээччитэ ураты айылҕалаах уонна Хотугу сир төрүт олохтоох аҕыйах ахсааннаах норуоттар үгэс буолбут сирдэригэр көҥүлэ суох мас кэрдибитин иһин 40 саастаах Забайкальскай кыраай олохтооҕор холуобунай дьыала тэрийдилэр диэн, биэдэмистибэ пресс-сулууспата иһитиннэрдилэр.
Буруйданааччы, Өлүөхүмэ оройуонун сиригэр- уотугар көмүс баайдаах сирдэри хостуур бэдэрээтчит тэрилтэтин салайааччытын быһыытынан үлэлии сылдьан, ханнык да быһаарыыта, көҥүлэ суох, үлэһиттэригэр хонтуруоллуур пуунтан вахта бөһүөлэгэр диэри 12 биэрэстэ усталаах суолу уурарга сорудахтаабыт, маныаха туох баар мастары кэрдэн, сир кырсын алдьатан туран суолу оҥотторорго дьаһал биэрбитэ биллибит.
Көҥүлэ суох суол оҥороору, 2021 с. тохсунньутугар бульдозерынан 11 гектартан тахса ойуур ыраастаммыт. Экспертэр сыаналыылларынан, РФ судаарыстыбыннай ойуурун пуондатыгар киллэрбит хоромньута 5,4 мөл. солк. тахса буолбут.
Маны таһынан, буруйданааччылар сокуоннайа суох дьаһаллар Хотугу сир төрүт олохтоох аҕыйах ахсааннаах норуоттарын үгэс буолбут айылҕаларын туһаныы быраабылатын кэһэр, тоҕо диэтэххэ, бу сир «Тээнэ» община сиригэр киирсэр.
Урбаанньыт хоромньутун сууматын олоччу төлөөбүт. Силиэстийэ кэмигэр кини атын сиргэ барбатын туһунан илии баттаабыт.
Билигин РФ холуобунай кодекс 3 чааһын 260- с ыстатыйатынан көрүллүбүт дьыалатын матырыйааллара Өлүөхүмэ оройуонугар ыытылыннылар.
