Ааспыт сылы анаардахха, өрөспүүбүлүкэ 2025 сылы кэккэ хайысхаларынан үчүгэй көрдөрүүлээх түмүктээтэ. Кыһыл көмүһү, таас чоҕу, ньиэби, гааһы, алмааһы туһаҕа таһаарыыга Саха Сирэ дойду үрдүнэн инники күөҥҥэ сылдьар, суруйда Саха парламент саайт.
Кэнники 7 сылга таас чоҕу хостооһун үс төгүл улаатан, устуоруйаҕа аан бастаан 50 мөл. туоннаны куоһарда. Онон, өрөспүүбүлүкэ таас чоҕу хостооһуҥҥа Арассыыйаҕа иккис, Уһук Илин бастакы миэстэҕэ таҕыста. Маннык рекорду олохтооһун Эльгатааҕы айылҕа баайдаах сир, «Колмар» хампаанньа кыамтатын үрдэтии түмүгэр ситиһилиннэ. Таас чох 98 %-а Нерюнгрига хостонор.
Былырыын 56 т кыһыл көмүс, 1,2 тыһ. т хорҕолдьун хостонно. «Нордголд» хампаанньа Токкотооҕу хайаны байытар кэмбинээти арыйда. Тэрилтэ «Гросс» көмүһү хостуур салаа үһүс эбийиэгин быһыытынан үлэлээн, 2027 с. 5 мөл. т урууданы хостуохтаах. Бу бырайыакка 80 млрд. солк. угулунна, 500-тэн тахса үлэ миэстэтэ тахсыа, онон Өлүөхүмэ дьоно көмүһү хостооһуҥҥа үлэлиэхтэрэ. Кэлэр 5-10 сылга кыһыл көмүһү хостооһун 70-75 туоннаҕа диэри улаатыа.
Уус Маайа улууһугар сибиниэһи, сыыҥканы туһаҕа таһаарыахтара. Манна хайаны байытар кэмбинээт тутуллан, сүүһүнэн үлэ миэстэтэ тахсыа. Бырамыысыланнас саҥа салааларын сайыннарарга Алдан, Нерюнгри, Өлүөхүмэ, Өлөөн, Усуйаана, Булуҥ, Эдьигээн, Томпо улуустарыгар минеральнай-сырьевой бааза үөрэтиллэр.
Өрөспүүбүлүкэ киэҥ сирдээҕин быһыытынан, экэниэмикэ сайдыытын кытта тэҥҥэ суол-иис оҥоһуллуохтаах, тырааныспар федеральнай ситимигэр тахсарга үлэ ыытыллар.
This post was published on 27.01.2026 14:09 14:09