Бүгүн, тохсунньу 24 күнүн иккис аҥарыгар улуус баһылыга Дмитрий Тихонов 2023 сыллаах үлэтин отчуотун Алтан нэһилиэгэр туруорда. Манна Ил Түмэн дьокутаата, сир баайыгар уонна айылҕа боппуруостарыгар сис кэмитиэтин бэрэссэдээтэлэ Андрей Находкин, улуус дьокутааттарын сэбиэтин бэрэссэдээтэлэ Иннокентий Андросов, управлениелар, тэрилтэлэр салайааччылара кыттыыны ыллылар. Мунньаҕы нэһилиэк баһылыга Николай Матчитов иилээн-саҕалаан ыытта.
Нэһилиэккэ ааспыт 2023 сылга 9,5 км уһуннаах гаас утаҕа тардыллан итиэннэ биэлсэр-акушер пууна үлэҕэ киирэн олохтоохтор үөрүүлэрэ үрдээбит. Салгыы чааһынай дьиэлэри гааска холботторуу уонна 150 миэстэлээх култуура киинин тутуута ыытыллаллар.
Өлөчөйтөн Табаҕаҕа үүтү туттарыы ситимин олохтуурга, убойнай сыах наадатын, Түөтэй муостатын бөҕөргөтүүгэ, суол өрөмүөнүгэр көмө көрүллэрин, уу массыыната наадатын туруорустулар.
Үүккэ бэриллэр көмө харчыны тыраахтар ыларга туһаныахха сөп дуо, үүт-эт былаана туолар дуо, маҕаһыыннарга тоҕо дэлэйдик атыыламматтарый, 3 сыллаах тыа хаһаайыстыбатын сылынан улууска туох үлэ барарый, чааһынай дьоҥҥо үүт туттарыытыгар сыана үрдүө дуо, эт туттарыытыгар туох ирдэбил баарый, гаас киллэртэриигэ биэнсийэтэ суох дьоҥҥо туох көмө, оскуола тутуллуутугар туох хамсааһын, кулууп дьиэтэ тутулларыгар туох көмө баалларын, элбэх оҕолоох ыалга уһаайба бэриллэр дуо, Ил Дархан бирииһигэр ыытыллар ат сүүрдүүтэ туох үбүгэр ыытылларын, Аллараа Бэстээххэ хара омуктар төһө элбэхтэрий, атыыларын ким хонтуруоллууруй, сир учаастагын хайдах ылалларый, ону сэргэ, Табаҕа суола саас алдьанарын, онно өрөмүөн үлэтэ барар дуо, Сыымахха тутуллар пиэрмэ, сиртэн хостонор баай туһунан, о.д.а. ыйытыылар киирдилэр. Манна туһааннаах салайааччылар толору хоруйдаатылар.
Баһылык Дмитрий Тихонов эдэр ыччакка туһаайан нэһилиэнньэ ахсаана элбииригэр дьоһун суолталаах демография боппуруоһун болҕомтоҕо ылалларыгар сүбэлээтэ. Улуус Ытык сүбэтин чилиэнэ, СӨ тыа хаһаайыстыбатын туйгуна Клавдия Федорова улуус дьаһалтата ыытан кэлбит үлэтин үрдүктүк сыаналаан нэһилиэгин дьонун аатыттан махталын биллэрдэ. Ил Түмэн дьокутаата, сир баайыгар, айылҕа боппуруостарыгар сис кэмитиэт бэрэссэдээтэлэ Андрей Находкин уонна улуус дьокутааттарын сэбиэтин бэрэссэдээтэлэ Иннокентий Андросов олохтоору улуус сайдыытыгар түмсүүлээхтик биир сүбэнэн үлэлииргэ ыҥырдылар. Отчуоту 60 киһи иһиттэ.
Марелла Баишева, Эркээйи хаһыат, Мэҥэ Хаҥалас улууһа.
