Хаҥалас улууһун саамай уһук сытар нэһилиэнньэлээх пууннарыттан биирдэригэр Кытыл-Дьурааҕа быйыл саҥа хочуолунай тутуута түмүктэнэр. «СӨ ОДьКХ» ГУТ инвестиционнай бырагырааматынан тутуллар. Хочуолунай сэлиэнньэ олорор дьиэтин пуондатын барытын хааччыйыаҕа, саҥа тутуллар дьиэлэри эмиэ хабыаҕа. Ол туһунан бырабыыталыстыба 2024 сыллааҕы үлэтин отчуотун кэмигэр этилиннэ.
«Кытыл-Дьураа олохтоохторо социальнай эбийиэктэри тупсарыыга үлэ ыыталлар. Билигин модульной амбулатория кэлэр сылларга тутулларыгар докумуон хомуйаллар. Оскуолаларын дьиэтин тупсарыыга эмиэ үлэ барар. Оҕолор үөрэнэллэригэр сөптөөх быһаарыы ылыахпыт», — диэтэ бырабыыталыстыба бэрэссэдээтэлин солбуйааччыта Анатолий Семенов.
Кытыы сиргэ суол боппуруоһа күүскэ турар. Уу ааллара кытылга тиксиилэригэр анаан дебаркадер туруоруллуохтаах. Тырааныспар министиэристибэтэ иһитиннэрбитинэн, тутуута Жатайдааҕы судоверфь оҥорон таһаарар былааныгар киллэрилиннэ.
Хаҥалас улууһугар бырабыыталыстыба отчуота олунньу 5 күнүгэр саҕаланна уонна олунньу 7 күнүгэр түмүктэнэр.
This post was published on 06.02.2025 18:01 18:01