Эдьигээн улууһугар бүгүн, от ыйын 1 күнүгэр, РФ Конституциятыгар көннөрүүлэри киллэриигэ куоластааһын ыытылла турар. Бэҕэһээ 187 уонна 185 нүөмэрдэрдээх учаастактардааҕы хамыыһыйа чилиэннэрэ бөртөлүөтүнэн ыраах табаһыттарга тиийэ сырыттылар.
Кыстатыам өттүгэр «Тугут»,»Сыатаа»,»Мэйээн» общиналар табаһыттарыгар үс сиргэ хамыыһыйа тохтуу сырытта. Табаларын манаан киэҥ сиринэн тэлэһийэ сылдьар үлэһиттэр кылгас кэмҥэ тохтоон куоластаатылар.
— Мин учаастактааҕы хамыыһыйаттан Татьяна Ермолаевалыын сырыттым. Татьяна Ивановна бэйэтэ чуумсуктаабыта, онон дьону билэр, тылын ылыннарар. Табаһыттар настарыйыанньалара үчүгэй, куоластыыртан аккаастанар киһи суох. Ордук элбэх үлэһит «Тугут» общинаҕа баар. Манна 40-тан тахса сыл уопуттаах удьуор табаһыт кэргэнниилэр Анна Николаевна уонна Григорий Григорьевич Никитиннар оҕолорун, сиэннэрин кытта көһө сылдьаллар. Сиэннэрин саас эрдэ буранынан илдьэ тахсаллар уонна күһүн үөрэх аһыллыыта бүһүөлэккэ киллэрэллэр. Ити курдук кыра эрдэхтэриттэн үлэҕэ уһуйаллар. Барыта бу күн 23 киһи куоластаата, — диэн кэпсээтэ 187 Кыстатыамнааҕы быыбардыыр учаастак хамыыһыйатын чилиэнэ Сергеева Надежда Николаевна.
Оттон Лииндэ диэки туһаайыынан Эдьигээннээҕи 185 учаастактан Львов Петр Степанович уонна Афанасьев Юрий Николаевич тиийэн, «Баахынай» общинаҕа 12 киһини куоластаттылар.
This post was published on 01.07.2020 17:48 17:48