29 Тохсунньу 29.01
  • -48°
  • $ 73,82
  • 83,32

Кырыымпа киэһэтэ сүргэни көтөхтө

16:07, 22 апреля 2016

Кулун тутар 21 күнүгэр Өксөкүлээх Өлөксөй аатынан Култуура дьиэтигэр   «Кыл Кырыымпа» национальнай инструменнар ансаамбылларын айар киэһэтигэр элбэх көрөөччү муһунна.


Айар киэһэ   Олоҥхо театрын артыыһа Николай Баишев-Күндүл «Айыллыы» олоҥхону   кырыымпа ансамблын доҕуһуолунан толоруутуттан саҕаланна.

Александр Дьячковскай-Саарын, Дмитрий Иванов, Варвара Степанова-Арчыына, Айсен Аммосов, Александра Алексеева «Айыы сыдьаайын» оҕолорунаан, Вероника Лыткина, Георгий Слепцов ырыаларын уонна тойуктарын кырыымпа лыҥкынас тыаһыгар доҕуһуоллатан толоруулара олус сонуннук иһилиннэ.

Ансаамбыл кырыымпаһыттара Аркадий Самойлов, Владимир Ксенофонтов, Василий Зырянов, Афанасий Моргусов, Николай Петров уо.д.а. айымньыларын иэйэн-куойан туран толордулар. С.Зверев аатынан СӨ Үҥкүү театрын, Дьокуускай к. 2 №-дээх искусство оскуолатын оҕолорун үҥкүүлэрин көрөөччүлэр күүстээх ытыс тыаһынан көрүстүлэр.

кыл 1

Ыспыраапка:


«Кыл кырыымпа» ансаамбыл 2015 с. тэриллибитэ. Кырыымпаҕа   С.А.Зверев-Кыыл Уола аатынан СӨ Үҥкүүтүн оркестрын артыыстара оонньууллар. Ансаамбылы СӨ култууратын туйгуна. Россия театрдарын сойууһун чилиэнэ Анна Томская салайар. Ансаамбыл кылгас кэм иһигэр номнуо көрөөччүлэр биһирэбиллэрин ылла, кырыымпа төрүт дорҕоонун көрөөччүгэ иҥэрдэ, дууһаны сылаанньытар күүтүүлээх артыыстарынан буоллулар. Сергей Зверев 115 сылыгар анаммыт фольклор өрөспүүбүлүкэтээҕи фестивалыгар   лауреат үрдүк аатын ылбыттара. Омук сирдэригэр элбэхтик гастроллаан, кырыымпа нарын тыаһын, саха омук ийэ дорҕоонун билиһиннэрдилэр.

Кырыымпа араас көрүҥүн ансаамбыл солиһа, айылҕаттан айдарыылаах, бэйэтэ туспа көрүүлээх, суоллаах-иистээх норуот маастара Руслан Габышев оҥорор. Кини саха төрүт инструменнара сайдалларыгар элбэхтик үлэлээбит ытык киһи   Александр Иванович Чахов үрдүк сыанабылын ылан, кини алгыһынан уонна өйөбүлүнэн бастакы инструменнарын оҥорбута. Эдэр маастар күн бүгүҥҥэ диэри инструменнарын тупсара, чочуйа сылдьар. Талааннаах маастар Руслан Прокопьевич айан оҥорбут кыл кырыымпатыгар ансаамбыл кыттыылаахтара   көмүс дорҕооннору таһаараллар.

Ансаамбыл кыттыылаахтара   Дьокуускайга, Сунтаар уонна Мэҥэ-Хаҥалас улуустарыгар маастар-кылаастары тэрийэн, кырыымпаҕа оонньуон баҕалаахтары үөрэттилэр.

Надежда Егорова, ааптар хаартыскаҕа түһэриитэ.

0
0
29 января 29.01
  • -48°
  • $ 73,82
  • 83,32