17 Тохсунньу 17.01
  • -48°
  • $ 73,82
  • 83,32

Кырдьар кырыыс буолбатын

18:39, 29 ноября 2016

Сочига аҕам саастаах дьон олоҕун хаачыстыбатын тупсарар, үйэни уһатар, көхтөөх, дьоллоох олохтоох буолар туһунан боппуруоһу тула кэпсэтии ыытыллыбыт. Бу туһунан Дьокуускай куораттааҕы пенсионердар Сэбиэттэрин бэрэссэдээтэлэ Ольга Луговая иһитиннэрдэ.


Ольга Ильинична дуорааннаах түһүлгэҕэ 26 регионтан уопсайа 500-тэн тахса киһи кыттыбытын этэр. Бары аҕам саастаахтары кытары ыкса үлэлэһэр түмсүүлэр, тэрилтэлэр, волонтердар, маннык үлэлииргэ интэриэстээх дьон  түмсүбүт буоланнар кэпсэтии олус интэриэһинэй, сэргэх буолбут. Саха сириттэн тэрээһиҥҥэ Дьокуускай куорат пенсионердарын Сэбиэтин чилиэннэрэ: врач-психолог, «Знание» уопсастыба чилиэнэ  Татьяна Ильина, түмсүү бэрэссэдээтэлэ Ольга Луговая, Ульяна Попова, Елизавета Цыгалова, Альбина Дашкина уонна кинилэри арыаллааччы, көмөлөһөөччү Ольга Луговая кыттыбыттар.

Сүлүөккэ ыытыллыбыт төгүрүк остуоллар, дакылааттар, маастар-кылаастар аҕам саастаахтар көрсөр кыһалҕаларын туоратыыга, кинилэр көхтөөх уонна туһалаах олоҕу олороллорун туһуттан тугу гынарга диэн сыаллаах-соруктаах ыытыллыбыттар. Маныаха аҕам саастаахтары кытары үлэ Россияҕа, тас дойдуларга хайдах ыытыллалларын, туох уратылаахтарын сэһэргэспиттэр, санааларын атастаспыттар. Итиэннэ бу хайысхаҕа үлэлэһээччилэр ыкса сибээстээхтик, тиһиктээхтик көмөлөөтөхтөрүнэ, кыһалҕалары чэпчэтэр, туоратар кыахтар баалларын бигэргэппиттэр. Маныаха орто дойду олоҕор араас бары буоларын эттэринэн-хааннарынан билбит саастаах дьон билиҥҥи олох үөһүгэр олус туһалаах, сыаналаах сүбэлэри биэриэхтэрин, этиилэри, туруорсуулары киллэриэхтэрин сөптөөҕүн бэлиэтээбиттэр. Онон сааһырыы, кырдьыы кэрчик кэмин мүччү туппакка, туһалаах өттүгэр эргитэр наадатын ыйбыттар.

Татьяна Ильина уһун үйэлэнии туһунан сырдатыыта улахан болҕомтону тардыбыт. Маныаха Саха сирин айылҕатын, аһын-үөлүн хаачыстыбатын, киһи бэйэтин доруобуйатын көрүнүүтүн туһунан слет кыттыылаахтара улаханнык сэргээн ыйыталаспыттар. Онтон Дьокуускай куораттааҕы биэнсийэлээхтэр түмсүүлэрин «Радость» диэн бөлөҕүн кыттыылаахтара эрчимнээхтик ыллаан-туойан үөлээннээхтэрин үөрдүбүттэр, атыттарга холобур буолбуттар.

Түмүккэ тэрээһин кыттыылаахтара сириттэн-уотуттан, ырааҕыттан тутулуктаммакка бары биир сыаллаах-соруктаах түмсүбүт дьон быһыытынан, сибээһи ыкса тутан үлэлииргэ быһаарыммыттар. Өскөтүн үйэни уһатыаҕы баҕарар, кырдьыыны туһалаах сааска эргитэргэ сорунар буоллахха, үлэ үөрүйэҕин олоххо киллэрэн иһэри ыйбыттар. Аҕам саастаахтарга сыһыаны тупсарар, кинилэргэ болҕомтону улаатыннарар үлэни күүһүрдэргэ уонна эдэрдэргэ өйдөтөр, сырдатар үлэни киэҥник тарҕатарга соруктаммыттар.

«Түмсүүбүтүгэр саҥа сүүрээннэри киллэрэн, үлэбитин сайыннаран иһиэхпит. Үйэни уһатарга, чэгиэн сылдьарга, туһалаах кырдьаҕас буоларга туһааннаах хамсааһыннар баар буолуохтара», — диир Ольга Ильинична.

0
0
17 января 17.01
  • -48°
  • $ 73,82
  • 83,32