Сергей Зверев — Кыыл Уола аатынан Саха Өрөспүүбүлүкэтин Үҥкүү тыйаатыра Санкт-Петербурга «Кынчарҕаннаах харахтаах кырыылаах сутуруктаах Кыыс Кыыдаан бухатыыр» үҥкүүнэн дьүһүйүллүбүт испэктээҕи аҕалан көрдөрдө. Туруорааччы режиссер Сергей Потапов Кыыл Уола олоҥхотун төрүт ньыманан буолбакка, саҥалыы көрөн, үҥкүүнэн, тыыннаах муусуканан уонна тойугунан доҕуһуоллаан, тыйаатыры муҥунан толорбут көрөөччүлэр дууһаларын сонно сүүйэ тутта.
Испэктээк саҕаланыаҕыттан бүтүөр диэри көрөөччүлэр биир тыынынан иһийэн олордубут, бириэмэ ааһа охсубутун билиминэ да хааллыбыт. Манна даҕатан эттэххэ, Санкт-Петербург тыйаатырдарыттан биир улаханнара «Балтийский дом» киин саалатыгар сахалар эрэ буолбакка, баһыйар өттө олохтоохтор, искусствоны сыаналааччылар тоҕуоруһа мустубуттара үөртэ. Биир да иччитэх миэстэ суоҕа.
Сахалыы тылы өйдөөбөт да киһи сыанаҕа туох буола турарын тута өйдүүр. Итиниэхэ режиссер үрдүкү маастарыстыбата тута көстөр. Бу дьүһүйүүгэ барыта сатаммыт: артыыстар толоруулара, хамсаныылара, сирэйдэрин-харахтарын уоттара, хас биирдии тымырдарын быыппастыылара. Ити күүстээх иэйиилэрэ хас биирдии көрөөччүгэ курдат киирэн аастылар диэн бигэтик этиэххэ сөп. Ити биирэ.
Иккиһинэн, испэктээк устатын тухары Сергей Зверев — Кыыл уола тыйаатыр оркестрын «Кыл Саха» төрүт дорҕоонун бөлөҕүн толорооччулара тыыннаах муусуканан доҕуһуоллуу олорбуттара — бэйэтэ туспа улахан үлэ диэн бэлиэтиэххэ наада. Кыл кырыымпа дорҕоонноро, хомус дьүрүһүйүүтэ, чуораан лыҥкыныыр тыаһа, дүҥүр дуораана, онтун ааһан — аллараа абааһылары кытта өлөр охсуһуу кэмигэр аныгы электроннай гитара оонньуута киирэн биэрбитэ — киһи тылынан кыайан тиэрпэт дьикти эйгэтигэр киллэрэн ыллылар.
Биир тылынан эттэххэ, сахабыт төрүт айымньыбытыгар маннык аныгылыы сүүрээн киирбитэ туора буолбакка, төттөрүтүн, табыгастаах буолан биэрдэ. Онон режиссер Сергей Потапов дьүккүөрдээхтик ити санаатын олоххо киллэрбитэ хайҕаныан эрэ сөп.
Ону таһынан, биллэн турар, Олоҥхону толоруу… Манна Олоҥхо тыйаатырыттан ыҥырыллыбыт толорооччу артыыстары сөхтүбүт-махтайдыбыт. Этэн-тыынан, иэйэн-куойан — хас биирдии дьоруой уобараһын толору арыйдылар. Бу барыта ханна да иҥнибэккэ, биир тыынынан бэрилиннэ. Онон Тыйаатыр артыыстара бэйэ-бэйэлэрин кытта биир ситимнээхтэрин толору көрдөрдүлэр. Кырдьык, күүстээх хамаанда хомуллубут диэн сыаналаатыбыт.
Труппа хас биирдии артыыһын ааттарынан ааттыаҕы баҕарыллар эрээри былаһааккабыт кыаллыбат. Онон, бука диэн, бырастыы гыныҥ. Кими да бэлиэтээн этиэххэ табыллыбат: бары күүстээхтэр, бары талааннаахтар, бары маладьыастар. Браво!
Түмүктээн эттэххэ, режиссер Сергей Потапов Кыыл Уола аатынан СӨ Үҥкүү тыйаатырын кытта «Балтийский дом» XXXV-с үбүлүөйдээх дойдулар икки ардыларынааҕы тыйаатыр бэстэбээлигэр кыттыыны ыллылар. Буолаары буолан, тэрээһини бастакынан арыйдылар. Манна Тибеттэн, Индияттан, онтон да атын дойдулартан испэктээктэр салгыы туруоруллуохтара. Ол эрээри Саха сирин артыыстара, биһиги барыбыт санаабытыгар, олус үрдүкү чыпчаалы туруордулар. Бэстэбээл алтынньы 18 күнүгэр түмүктэнэр. Бэйэбит биир дойдулаахтарбытыгар ыалдьабыт, түмүгү долгуйа күүтэбит.
Ааптар: Анфиса Слепцова, РФ суруналыыстарын Сойууһун чилиэнэ, Санкт-Петербург к.
This post was published on 07.10.2025 11:27 11:27