Тэрээһин кыттыылаахтара Знамяны Аҕа дойду улуу сэриитигэр норуот хорсун быһыытын үйэтитэр символ буоларын, үүнэр көлүөнэҕэ патриотизмы иитэрин кэпсээтилэр.
Кулун тутар 4 күнүгэр Кыайыы Знамятын Орто-Дойду национальнай нэһилиэккэ көрүстүлэр. Баһылык, бойобуой дьайыы бэтэрээннэрэ, бэтэрээннэр сэбиэттэрин бэрэссэдээтэлэ кыттыыны ыллылар. Оҕолор байыаннай кэмнээҕи ырыаны толордулар. Төбүлэххэ оскуола эдэр армеецтара көрүстүлэр.
Кулун тутар 5 күнүгэр Знамя Индигир национальнай нэһилиэккэ сырытта. Оскуола кэлэктиибэ уонна үөрэнээччилэр көрүстүлэр. «День Победы» ырыа ылланна.
Кулун тутар 6 күнүгэр Муома оскуолаларыгар Кыайыы сүрүн бэлиэтин чиэстээтилэр. Эдэр армеецтар ортолоругар 11 кылаас үөрэнээччитэ Лушкин Алексей баар, кини Аҕа дойду улуу сэриитин кыттыылааҕа, Кыһыл Сулус уордьаннаах Рачинскай Александр Васильевич хос сиэнэ буолар.
Бүгүн, кулун тутар 7 күнүгэр, эстафетаны Абый улууһа тутар. Аахсыйа 20 оройуону таарыйда, ыам ыйын 9 күнүгэр өрөспүүбүлүкэ киинигэр Кыайыы күнүн көрсөр.
Эстафета Кыайыы 80, Россияҕа Аҕа дойдуну көмүскээччи, Саха сиригэр Ийэ дойдуну көмүскээччи сылларыгар ананар.
This post was published on 07.03.2025 11:02 11:02