Саха Сиригэр кыһыҥҥы күҥҥэ-дьылга көһүү саҕаланар. Өрөспүүбүлүкэ үрдүнэн хаар түһүө, температура намтыа. Чугастааҕы кэмҥэ күн-дьыл туһунан УГМС метеорологическай уонна агрометеорологическай сабаҕалааһыннарын отделын начаалынньыга Саргылана Никитина кэпсээтэ.
«Бу нэдиэлэҕэ кыстыкка бэлэмнэнии бара турар. Өрөспүүбүлүкэ бүтүннүүтүн кэриэтин хаардаах былыттаах тымныы күн баһыйыа. Онуоха температура эрэһиимэ нуормаҕа чугас буолуоҕа. Дьокуускайга уонна киин сиргэ мөлтөх хаар түһүө, элбэх хаары билиҥҥитэ күүппэппит. Күн-түүн кыралаан түһүө. Чэппиэргэ Дьокуускайга күнүс салгын температурата -5…-7 кыраадыс буолуоҕа», — диэн ЯСИА Саргылана Никитина кэпсээтэ.
Эксперт бэлиэтээбитинэн, киин оройуоннарга өр сыллар көрдөрүүлэринэн, кыстык хаара алтынньы 12-14 күннэригэр түбэһэр.
Бу күннэргэ хотугулуу-илин уонна Арктика кытылыгар элбэх хаар түһэрэ күүтүллэр.
«Өрөспүүбүлүкэ хотугулуу-илин өттүгэр, Арктика кытылынан күүстээх тыал, хаардаах күн-дьыл күүтүллэр. Атын өттүгэр кыра хаар түһүөҕэ», — диэн Саргылана Никитина эбэн эттэ.
Алтынньы 9-10 күннэригэр күн-дьыл билгэтэ
Кыра хаар соҕуруулуу-арҕаа, арҕаа, соҕуруу уонна хотугулуу-илин диэки — сорох сирдэринэн кыра хаар сабаҕаланар.
Түүн киин оройуоннарга салгын температурата -6…-11 кыраадыс буолуоҕа, арыллар кэмигэр -13…-18 диэри тымныйыаҕа. Хотугулуу-илин — -13…-18 диэри, арыллар кэмигэр -23…-28 диэри буолуоҕа.
Күнүс Саха сирин киинигэр -3…-8, хоту -6…-11, соҕуруу, соҕуруулуу-арҕаа -4…+1 буолара сабаҕаланар.
This post was published on 08.10.2025 13:48 13:48