19 Тохсунньу 19.01
  • -48°
  • $ 73,82
  • 83,32

Кыһамньыта суох салайааччыларга холуобунай дьыаланы тэрийэргэ этии киирдэ

16:22, 01 ноября 2016

Коммунальнай өҥөнү хааччыйар тэрилтэлэргэ салайар компаниялар үбү-харчыны төлүүргэ тиэтэйбэттэр. Уопсастыбаннай сэбиэт мунньаҕар Госстройжилнадзор управлениетын, борокуратуура үлэһиттэрэ кытыннылар.


«ТСЖ-лар уонна салайар компаниялар сиэрэ суохтук быһыыланыылара күн-түүн элбии турар. Ол иһигэр үбү-харчыны талбыт туттуу тахсарын түмүгэр дьон коммунальнай өҥө иһин төлөбүрү хос төлүүргэ күһэллэр», — диэн Госстройжилнадзор тэрилтэ салайааччытын бастык солбуйааччы Любовь Кузьмина этэр.

Кини бэлиэтээбитинэн, дьон ИДьМ үҥүстэхтэринэ, суукка биэрэргэ сүбэлииллэр. Тоҕо диэтэххэ, бу гражданскай-быраап сыһыаннаһыылара. Сороҕор суут үҥсүүгэ аккаастыыр. Баҕар, суут үҥсээччи туһатыгар да быһаарыы таһаардаҕына, албастаах схема үөскэтиллэр.

«Мөккүөрү суут нөҥүө быһаарыахха, мөлүйүөн солкуобайы төлүүрү уурдарыахха сөп. Ол гынан баран салайар компания актыыба суох, ол аата хантан да үбү-харчыны ылар кыаҕа суох. Ити түмүгэр иэс аныгыскы сыл тарыыбыгар көһөр. Ити түмүгэр дьон бастаан утаа бэйэлэрин тустарыгар, ол кэнниттэн суобаһа суох компания иһин төлүүргэ тиийэллэр», — диир кини.

Сыл аайы салайар компаниялар уонна табаарыстыбалар иэстэрэ үрдүү турар. Бүгүҥҥү ааҕыынан «Якутскэнерго» иннигэр иэстэрэ 581 мөл.солк. куоһарда. «Водоканал» 313 мөл.солк. ситэри ылбата. Ити түмүгэр алтынньы саҥатыгар уопсайа 1,3 млрд.солк. кэриҥ иэс үөскээн турар.

zhkh1

Любовь Кузьмина туһанааччылар төһөнү төлүүллэриттэн ресурсаны хааччыйар тэрилтэлэр үлэлэрэ быһаччы тутулуктанарын чиҥэтэн этэр.

«Иэстэн сылтаан итиинэн, уунаан ситэри хааччыллыы оҥоһуллубат, инвестиционнай бырагыраамалар туолбаттар. Ити барыта дьон олоҕун хаачыстыбатыгар быһаччы дьайар», — диир кини.

Уопсастыбаннас бэрэстэбиитэллэрэ маннык сиэрэ суохтук быһыыланар компанияларга төлөбүр онон-манан эргийбэккэ быһаччы оҥоһулларын таһынан холуобунай дьыаланы тэрийэргэ этии киллэрэллэр.

zhkh2

Мунньах түмүгүнэн, борокуратуура, ресурсанан хааччыйар тэрилтэлэр, былаас уорганнара хардарыта дьайсыылаахтык үлэлииллэригэр уопсастыбаннай сэбиэт этии киллэрдэ.

0
0
19 января 19.01
  • -48°
  • $ 73,82
  • 83,32