Дьаһалта отчуотун иккис бөлөҕү Сунтаар улууһун баһылыгын 1-кы солбуйааччыта Николай Александров салайан сырытта. Отчуоту истээри, мэлдьи да буоларын курдук, бу нэһилиэктэргэ балачча киһи кэллэ.
Ханнык баҕарар үлэ-хамнас баараҕай тутууларынан, промышленность, ОДЬКХ курдук эйгэлэргэ сайдыы барыытынан сыаналанар буолбута көһүннэ. Ол курдук, дьону-сэргэни долгутар боппуруостар бу салааҕа сыһыаннаахтар.
Кутанаҕа кэнники сылларга үгүс үлэ ыытыллан, билигин кулууптан ураты социальнай эбийиэктэр барыта саҥа тутуулар. Оскуола, уһуйаан, ууну ыраастыыр ыстаансыйа, ону тэҥэ хаарбах дьиэттэн көһөрүү бырагырааманан 12 кыбартыыралаах таас дьиэ тутуллан, нэһилиэнньэ олоҕун туруга тупсаҕай. Быйыл үөрэх систиэмэтин модернизациялааһын бырагырааманан оскуола толору өрөмүөннэнэн саҥалыы тыыннанна.
Нэһилиэнньэ сүрүннээн туруорсар боппуруоһунан оруобуна 60 сыл турбут кулууп дьиэтин саҥардыы буолла. Биллэн турар, олохтоохтору түмэр, сомоҕолуур, сайдыыны түстүүр сүрүн сиринэн култуура киинэ буолар. Онон саҥа дьиэни туруорсаллара оруннаах.
Нэһилиэнньэ чөл, чэгиэн буоларыгар доруобуйа эйгэтин тула эмиэ киэҥ ырытыһыы буолла. Ааспыт сылга Күүкэй, Сиэйэ, Түбэй Дьаархан олохтоохторун доруобуйатын туругун көрөн-истэн олорбут соҕотох быраас Дьокуускайга көһөн, билигин улахан кыһалҕа турар. Онон бырааһынан хааччыйыыга эмиэ тустаах боппуруос турда, суруйда @suntaar_ulus
