Кустуур нэһилиэгэр бу күннэргэ нэһилиэнньэ уопсай сүбэ мунньаҕа буолла. Нэһилиэк сайдыытыгар, нус-хас олохтоох буолуутугар бастакы көмүөл мууһун хамнатааччы – нэһилиэнньэ бэйэтэ. Онуоха “Олохтоох көҕүлээһиннэри өйүүр бырагыраама” көмө буолар.
Нэһилиэккэ бу бырагыраамаҕа кыттарга икки бырайыагы киллэрбиттэр — оҕо оонньуур былаһааккатын саҥардан оҥоруу, эбии тупсарыы үлэтэ, иккиһинэн И.Н. Слепцов аатынан уулусса аҥар, ортоку эҥэригэр ититэр ситим тардылларыгар таһынааҕы турбаларын (матырыйаалын) аҕалтарыы. Уопсай сүбэннэн куоластааһыҥҥа нэһилиэнньэ ордук сытыытык турар кыһалҕатын — ититэр ситим эбии тардылларын таллылар.
Мунньахха атын да боппуруостар ырытылыннылар, дьүүллэһилиннилэр. Ол курдук, нэһилиэк баһылыгын солбуйааччыта Алексей Баишев аҕалар сүбэлэрин, түмсүүлэрин ситэрэн тэрийиини туруорда. Этэргэ диэри, “Норуот күүһэ – көмүөл күүһэ”! Бары биир санаанан, сүбэнэн салайтаран олордохпутуна, үлэлээтэхпитинэ-хамнаатахпытына эрэ кыһалҕа кыайтарыа, баҕа санааларбыт туолуохтара, олохпут уйгута тупсуоҕа.
Салгыы нэһилиэк көхтөөх олохтооҕо, уопсастыбынньык Светлана Черепанова “Госуслуги” сайт нөҥүө аҕыйах нэһилиэнньэлээх пууннары мобильнай интернет ситимигэр босхо холботууга куоластааһын буола турарын туһунан сырдатта. Эрэгийиэҥҥэ куоластыан сөптөөх нэһилиэктэр ахсааннарыгар киирбиппитинэн, бу кыаҕы толору туһанан хаалан, куоластааһыҥҥа көхтөөх кыттыыны ыларга, илии баттааһын тэрийэргэ ыҥырда. Бу олохпут тупсарыгар, сайдыытын ситиһиигэ киэҥ хардыы буолуоҕа.
Ааптар: «Бытантай уоттара» хаһыат
