Үлэ киниискэтэ электроннай көрүҥҥэ көһүүтүн туһунан СИА-ҕа регионнааҕы үлэ миниистирин солбуйааччыта Альбина Трубина кэпсээтэ.
«2020 сылтан дойду үрдүнэн, ол иһигэр Саха сиригэр эмиэ, үлэ киниискэтэ электроннай көрүҥҥэ көһөрүллэр. Маннык дьаһаныы — киниискэни туттарга табыгастаах, сибидиэнньэ сүппэт, үлэ ыстааһын туһунан информацияны онлайн туһаныахха сөп», — диир Саха сирин үлэҕэ миниистирин солбуйааччыта Альбина Трубина.
Санатар эбит буоллахха, тохсунньу 1 күнүттэн электроннай үлэ киниискэлэрин олоххо киллэрэр туһунан сокуон тахсыбыта. Бу саҥа дьаһал «Цифровая экономика» национальнай бырайыак чэрчитинэн ылыллар.
«Бу саҥа көрүҥҥэ көһүү — хас биирдии киһи баҕа өттүнэн талыыта. Үлэһит киниискэтэ электроннай буоларын дуу, кумааҕынан хааларын дуу бэйэтэ талар бырааптаах. Онтон 2021 сылга үлэҕэ киирээччилэр тута электроннай киниискэни оҥоттороллор», — диэн быһаарда тустаах салайааччы.
Кини эппитинэн, хас биирдии үлэһит 2020 сыл бүтүөр диэри үлэни биэрээччитигэр суругунан сайабылыанньа түһэриэхтээх. Онно кини кумааҕы киниискэни хаалларарын дуу эбэтэр электроннайга көһөрөллөрүн ыйыахтаах. Өскөтүн электроннайга көһүүнү талар түгэнигэр — кумааҕы киниискэлэрин илиилэригэр ылаллар.
Сиһилии https://ysia.ru/bumazhnyj-ili-elektronnyj-yakutyanam-predstoit-vybrat-format-trudovyh-knizhek/ ааҕыҥ.
