«Инфраструктура для жизни» национальнай бырайыагынан аспааллаах суолу тутуу «Точка будущего» үөрэх комплексыгар, олорор кыбаарталга уонна «Жатай» куорат уокуругун территориятыгар микрорайоҥҥа табыгастаах айан суолун тэлгэтиэҕэ.
2,18 км уһуннаах суол бырайыагын олоххо киллэрии кулун тутарга нуул циклтан саҕаланан, кэлэр сылга түмүктэниэҕэ. Бэриллибит болдьоххо икки балаһалаах эбийиэк аспаал-бетон сабыылаах суол хапытаалынай тутуу буолуоҕа. Маны таһынан, газон миэстэтэ, тротуардар, бэлэсипиэт суола оҥоһуллуохтара, итиэннэ оптуобус үс павильона көрүллүөҕэ.
Итини сэргэ национальнай бырайыак чэрчитинэн, саҥа 112 суол бэлиэтэ, 48 светофор, 63 икки консоллаах тас сырдатар тирэхтэр, 4,2 тыһыынча п.м. сатыы дьон сылдьалларыгар бүрүөһүннэр туруоруллуохтара.
Бэлиэтээн эттэххэ, “Точка будущего” – бизнес социальнай эппиэтинэһигэр олоҕуран, оҕолору босхо үөрэтэр үтүө бырайыак. Комплекс Дьокуускайтан чугас «Нам» региональнай суолталаах суолтан Жатайга киириигэ тутуллар. Учаастакка 840 миэстэлээх оскуола, 200 миэстэлээх оҕо саада, бассейннаах уонна уус-уран гимнастика саалалаах спортивнай комплекс, педагогтар уонна иитэр дьиэ кэргэттэр олорор дьиэлэрэ баар буолуохтара, сылаас арктическай турааһыннар уонна элбэх таһымнаах паркинг тутуулара ыытыллар. Үөрэх комплексын уопсай иэнэ 63 тыһыынча квадратнай миэтэрэ кэриҥэ буолуоҕа.
This post was published on 02.03.2026 13:09 13:09