Дойду Бэрэсидьиэнэ Владимир Путин сорудаҕынан, 2025 сыл тохсунньу 1 күнүттэн «Култуура земскэй үлэһитэ» диэн бырагыраама үлэлиир. «Земскэй учуутал» уонна «Земскэй быраас» бырагыраамаларын курдук, култуура үлэһитэ тыа сиригэр үлэлии бардаҕына 1 мөл.солк. суумалаах биир кэмнээх төлөбүрү ылар. Онтон Уһук Илиҥҥэ төлөбүр икки төгүл үрдүк — 2 мөл.солк, суруйда Саха парламент саайт.
«Култуура земскэй үлэһитэ» бырагыраамаҕа сайаапканы күн бүгүн Арассыыйа хайа баҕарар олохтооҕо судаарыстыба өҥөтүн порталын «Госуслуги» нөҥүө биэрэр кыахтанна. Ол туһунан СӨ Култууратын уонна духуобунай сайдыытын миниистирэ Афанасий Ноев өрөспүүбүлүкэтээҕи Медиа-кииҥҥэ буолан ааспыт төгүрүк остуолга иһитиннэрдэ.
Улуустарга, чуолаан Аартыкаҕа оҕо ускуустубатын оскуолатыгар, кулуупка нэһилиэнньэ күннээҕи олоҕун сэргэхситэр, оҕолору муусукаҕа, ырыаҕа-үҥкүүгэ уһуйар үлэһиттэр тиийбэттэр. 2026 с. бу бырагырааманан 27 исписэлиис дуогабардаһан үлэлии барыахтаах. «Култуура земскэй үлэһитэ» бырагыраамаҕа сайаапкалары тохсунньу 12 күнүттэн муус устар 15 күнүгэр диэри ылыахтара.
Бырайыак сүрүн соруга — тыа сиригэр үлэлиир култуура эйгэтин исписэлиистэрин элбэтии. Бырагыраама кыттыылаахтара профильнай үрдүк үөрэх кыһатын бүтэрбит эдэр ыччат, эбэтэр идэлэринэн үлэлии сылдьар дьон буолуохтарын сөп.
This post was published on 18.02.2026 14:08 14:08