20 От ыйа 20.07
  • 17°
  • $ 88,02
  • 96,04

Култуура министиэристибэтэ эдэр литератордары үөрэттэриэҕэ

14:38, 15 ноября 2018
Текст:
Читайте нас на
Яндекс Новости
ЯДВ

Култуура миниистирэ Юрий Куприянов, Саха сирин Бастайааннай бэрэстэбиитэлэ Андрей Федотов уонна Литературнай институт ректора Алексей Варламов өрөспүүбүлүкэттэн эдэр литератордары бэлэмнээн таһаарар туһунан кэпсэттилэр.


Соторутааҕыта М. Горькай аатынан Литературнай институкка саха норуодунай суруйааччыта Николай Лугинов айар үлэтигэр анаммыт тэрээһиннэр буолбуттара. Ол курдук, Николай Алексеевич Литинститут устудьуоннарын, преподавателлэрин  кытары көрсүбүтэ, «Хуннские и монгольские мотивы. Мир Николая Лугинова глазами художника Д. Бойтунова» диэн ааттаах быыстапка үлэлээбитэ. Ону тэҥэ «Юрий Кузнецов. Взгляд с Востока» киинэни сүрэхтээбиттэрэ. Көрсүһүүнү “Саха сирин суруйааччылара” ассоциация бэрэссэдээтэлэ Олег Сидоров салайан ыыппыта.

Бу тэрээһиннэргэ сылдьан баран, ректор Андрей Варламов саха суруйааччыларын уонна өрөспүүбүлүкэттэн литератураҕа холонор, суруйар-айар ыччаты кытары сибээһи олохтуур, кэҥэтэр туһунан санааны эппитэ.

“Биһиги регионнарга эдэр, талааннаах дьону куруук көрдүүбүт. Билиҥҥи кэмҥэ литературнай тылбаасчыттары бэлэмнээһин – үөрэхпит биир тутаах хайысхата”, — диэн кини этэр.

Ол түмүгэр бу көрсүһүү тэрилиннэ. Саха сирин бастайааннай бэрэстэбиитэлэ Андрей Федотов нуучча суруйааччыларын уонна тылбаасчыттарын түмсүүлэрин кытта өрөспүүбүлүкэттэн идэтийбит литературнай каадырдары бэлэмнээһиҥҥэ бииргэ үлэлэһэр наадатын ыйда. Оттон култуура миниистирэ Юрий Куприянов ыччаты үөрэттэрэргэ, бу хайысханы салгыы сайыннарарга көмөлөһөргө бэлэмин биллэрдэ.

Онон, айар, суруйар, тылбаастыыр, инникитин идэтийэн туран литературанан дьарыктанабын диир ыччат дьон, эһиэхэ, улахан кыах бэрилиннэ. Бу иннинэ “Саха сирин суруйааччылара” ассоциация эдэр тылбаасчыттарга куонкурус биллэрбитэ. Ол түмүгүнэн, талааннаах ыччат талыллан, сүүмэрдээһини аастахтарына, Литературнай институкка үөрэнэ барыахтарын сөп.

Ангелина ВАСИЛЬЕВА, “Саха сирэ” хаһыат, edersaas.ru

Следите за самым важным и интересным в Telegram-канале и WhatsApp-группе ЯСИА