Өктөм нэһилиэгэ халаан уутуттан 1980 сылтан эмсэҕэлиир. Улахан уу 2010 сыллаахха кэлэ сылдьыбыта — 214 ыал дьиэтэ ууга барбыта. Ити быһылаан кэнниттэн намыһах сирдэргэ олорор дьиэлээх ыаллары үрдүк сирдэргэ көһөрүүгэ быһаарыы ылыллыбыта.
Быйыл сайын СӨ баһылыгын э.т. Айсен Николаев Өктөмҥө сылдьан бу дьаһаныы чэрчитинэн үлэ барарын көрөн үрдүк сыанабылы биэрбитэ. 2018 сыллааҕы көмүөл уутугар 67 ыал, 300 киһи эмсэҕэлээбитэ, 12 уулусса суол алдьаммыта.
— Нэһилиэк ууттан эмсэҕэлээбит олохтоохторо өрөспүүбүлүкэ, улуус былаастарын өттүттэн өйөбүлү ыллылар, — диэтэ нэһилиэк баһылыга Александр Большаков, — Нэһилиэк мунньаҕар СӨ бырабыыталыстыбатын бэрэссэдээтэлин бастакы солб. Алексей Колодезников араас министиэристибэлэргэ уонна биэдэмистибэлэргэ көмөлөһөргө чопчу сорудахтары биэрбитэ. Бүгүн биһиги бары быһыттар уонна суоллар өрөмүөннэммиттэрин көрөбүт. Бу боппуруос федеральнай уонна өрөспүүбүлүкэ көмөтүн ылла. Саҥа «Юбилейнай» микро-оройуоҥҥа уу ылар сириттэн ыаллары көһөрүүгэ инфраструктураны оҥорууга үлэ барар. Быйыл Баттах диэн кыбаартал бүтэһик микро-оройуонугар гааһы киллэрии, стояктары туруоруу, уоту таҥыы үлэтэ түмүктэниэхтээх. 2010 сыллаахха 432 учаастак дьоҥҥо бэриллибитэ, быйылгы ууттан эмсэҕэлээбиттэргэ бэриллэри эптэххэ 485 учаастакка тутуу барар.
Бу күннэргэ «Сахатранснефтегаз» АУо тутар-таҥар управлениета манна тигинэччи үлэлии сылдьар.
— Уулуссанан барар гаас ситимин таҥыыны биһиги 2017 сылтан саҕалаабыппыт, — кэпсиир ыстаарсай маастар Иван Неустроев, — Былырыын от ыйыттан сэтинньигэ диэри биһиги 10 килэмиэтири тардыбыппыт. Быйыл эмиэ от ыйыттан үлэлиибит. Алта килэмиэтири тардыахтаахпыт уонна балаҕан ыйын ортотугар диэри үлэни бүтэриэхтээхпит. Бырайыак быһыытынан 362 ыалга гааһы киллэриэхтээхпит. Кыраапыктан хаалыы суох. Сыбаарсыктар икки биригээдэлэрэ үлэлиир, ол эбэтэр хас биирдии дьиэҕэ сыбаарсык уонна силиэсэр, икки тиэхиньикэ — сыаптаах уонна куопсуктаах экскаватордар, механизатордары кытары барыта аҕыс киһи.
Саҥа микро-оройуон олохтооҕо Станислав Старостин 2011 сыллаахха саҥа сир учаастагын ылбыта.”2010 сыллаахха биһиги 1987-ҕэ туттан киирбит дьиэбитин түннүгэр тиийэ уу ылбыта. Быйыл дьиэбитигэр уоту уонна гааһы киллэриэхпит диэн дьаһалтаттан эрэннэрбиттэрэ. Онон биһиги дьиэбит түһэр оннун оҥордубут, эһиил саҥа дьиэ туттуохпут”, — диир кини.
Өрөспүүбүлүкэ баһылыгын э.т. А.С.Николаев Өктөмҥө кэлэ сылдьар кэмигэр, от ыйын 23-гэр, үрдүк сирдэргэ бастакы 15 учаастак дьиэлэри тутууну саҕалыахтаахтарын туһунан этиллибитэ, атыттар онтон кэнники үс сылга. Дьиэлэри барытын 2021 сылга тутан киллэрэр сорук турар.
Ааптар: Василий МАРКОВ.
